Dihang nahibaw-an nako kagahapon sa buntag nga gi-ambush ang sakyanan ni Tejero Barangay Konsehal Jingjing Cadungog, ug napatay sa bodyguard ni Cadungog ang usa sa namanhig, nangutana dayon ko kon polis ba ang napatay.
Daan na man gud ko nga nagduda nga mga polis ra maoy naghimo sa ubang mga pagpamusil ug pagpamatay dinhi sa dakbayan.
Wala pa dayon masuta, apan pagkataudtaud, nahibaw-an na nga polis gyud ang napatay ug gani nadakpan pa ang iyang kaubang polis.
Misantop dayon sa akong hunahuna kon ngano nga gusto man nilang patyon si Cadungog. Sagad sa mga gipangpatay, giingong dunay kalabotan sa ilegal nga drugas, apan kini si Cadungog wala gyud madungog nga nalambigit sa ilegal nga drugas.
Nahinumdom dayon ko sa gisulti ni Presidente Duterte pag-anhi niya sa dakbayan sa Sugbo pipila ka buwan ang nakalabay nga mangamatay ang mga involve sa drugas.
Apan matud ni Mayor Tomas Osmeña nga wala gyud siya makadungog og report nga si Cadungog nalambigit sa negosyo sa drugas.
Apan diha nga napatay si SPO1 Adonis Dumpit sa mga ahente sa NBI ug Regional Intelligence Division (RID) didto sa Bohol kaniadtong miaging buwan, nakuhaan si Dumpit og daghang pinutos nga shabu, ug ang armas nga gipanag-iya ni Cadungog.
Nangangkon si Cadungog nga iya na nga gibaligya ang armas, apan tingali mora’g may pagduda ang kapolisan.
Dili kaha kini maoy rason nga gitinguha nga patyon sa mga polis si Cadungog?
Buyno, ang NBI maoy giawhag nila ni Mayor Osmeña nga mohimo og imbestigasyon sa hitabo nga pagtinguha pagpatay kang Cadungog tungod kay ang mayor wala nay pagsalig sa kapolisan, ilabi na ang mga sakop sa Criminal Investigation and Detection Group (CIDG).
Wala makagusto si Osmeña nga ang polis nga kauban sa napatay nga mibanhig kang Cadungog, gipugos pagkuha sa CIDG gikan sa Waterfront Police Station.
Pastilan, nindot kaayo atangan ang kalamboan sa imbestigasyon niining maong kaso.
Ang pagduda sa katawhan nga adunay “bendisyon” sa kadagkoan sa kapolisan kining sagunson nga pagpamatay nga nahitabo dinhi sa dakbayan.
Kon mao na, kuyaw gihapon ang sitwasyon ni Cadungog, ug niadtong ubang tawo nga gisuwayan sa pagpatay, apan nakalingkawas gikan sa tino nga kamatayon.
Tan-aw nako, isog kaayo ang mga polis nga motiklo sa mga tawo nga nalambigit sa gidiling drugas.
Kini tungod sa pasalig ni Presidente Duterte nga duphan niini ang pagahimoon sa kapolisan batok sa mga tawo nga nalambigit sa gidiling drugas.