Kurog sa kahadlok
SAKSAK SINAGOL - Lucky Malicay (Banat) - July 11, 2018 - 12:00am

Mikurog usab sa kahadlok ang ubang lokal nga opisyal sa nasud niining sunodsunod nga pagpatay sa mga mayor didto sa Luzon.

Hinuon, kinsa ba ang dili mahadlok kay basin unya kon adunay usa na usab kanila ang sunod nga mahagba.

Kaniadong Hulyo 2, naigo sa dughan ang mayor sa Tanauan City sa Batangas nga si Antonio Halili gikan sa giingong sniper atol sa flag-raising ceremony.

Atong nailhan si Halili nga usa sa mga isog nga mikontra batok sa negosyo sa druga.

Gani iyang iparada kadtong mga drug pusher nga masikop didto sa iyang siyudad.  

Nianang pagkaugma, ang mayor sa General Tinio, Nueva Ecija na usab ang gipatay. Gikan sa usa ka meeting si Mayor Ferdinand Bote sa dihang gibanhigan kini sakay sa iyang sakyanan sa wala mailhing mga mamuno.

Ug kaniadtong Sabado sa hapon, gibanhigan ang bise mayor sa Trece Martirez City sa Cavite samtang kini nagsakay sa iyang sakyanan.

Patay dihadiha si Bise Mayor Alex Lubigan samtang didto na sa hospital nabugtoi sa kinabuhi ang iyang drayber.

Taliwala niining mga pagpatay sa mga lokal nga opisyal sa nasud, gustong makigkita ang mga mayor kang Presidente Rodrigo Duterte sa paningkamot nga masulbad kining maong problema.

Adunay panagtigum usab nga pagahimuon ang mga mayor sa nasud didto unya sa siyudad sa Davao aron pagtuki sa maong isyu.

Dinhi sa lalawigan sa Sugbo, susama usab ang gibati sa mga lokal nga opisyal niining serye sa mga pagpatay.

Adunay gusto nga mopalig-on sa ilang siguridad pinaagi sa pag-request og mga police escort.

Apan ang problema mao nga nagkulang kuno ang mga polis sa probinsiya. Gani, daghan sa mga police escort sa mga mayor ang gibawi na kuno sa Police Regional Office-7.

Mao na nga mitambag si Gobernador Hilario Davide III ngadto sa mga mayor nga mo-hire na lang og mga private security agency.

Hinuon, dili usab nato kalikayan nga bation og kahadlok ang atong mga lokal nga opisyal tungod niining mga panghitabo. Sa ilang pagserbisyo sa katawhan, dili kalikayan nga adunay uban nga wala mahimuot.        

Apan kon walay nabuhat ang atong mga lokal nga opisyal nga makapasuko sa uban, wala man siguro sila’y rason nga mahadlok.

Anaa ra gayud kana sa usa ka opisyal sa gobiyerno, kay kon walay trampas ang ilang pagserbisyo, walay siguroy maagrabyado.

ANTONIO HALILI
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with