Pulos sila hilumon
ARANGKADA - Leo Lastimosa (Banat) - July 11, 2018 - 12:00am

Usa sa nakahimong talagsaon sa kontrobersiya nga naglambigit ni Barangay Kapitan Niña Mabatid sa Mabolo, Dakbayan sa Sugbo ug sa mga opisyal ug kawani sa Waterfront Cebu City Hotel (WCCH), mao nga naabtan og dul-an sa buwan una nahibaw-an sa publiko ang insidente.

Mabasol tingali ang kalinga sa mga sakop sa media sa ubang mga kontrobersiya nga ilang nataligam-an ang pagpa-blotter sa taga WCCH sa insidente sa Mabolo Police Station ug sa barangay hall sa Lahug, o nagtapol lang gyud sa ilang trabaho.

* * *

Wala mangiyugpos ang hingtungdang mga opisyal ug mga kawani sa WCCH. Human sa insidente niadtong Hunyo 19 ning tuiga, nitaho dayon sila sa presinto sa Mabolo ug sa kinadul-an nga barangay hall.

Dayon nipasaka sila og kaso batok ni Mabatid atubangan sa Visayas Ombudsman ug ni Ramon Floresta, ang lalaking kuyog ni Mabatid, atubangan sa Cebu City Prosecutor’s Office.

Apan wa sila manawag sa mga sakop sa media, nga sa kadaghan tingali sa gisunod nga mga balita, o nagpabaya na sab sa ilang gimbuhaton, wa na makaato pagsubay sa bag-ong mga kasong gisang-at sa Ombudsman ug sa piskaliya.

* * *

Bisan sila si Mabatid ug Floresta wa sab magsaba. Kon tinuod ang pangangkon ni Mabatid nga nasuko siya pag-ayo kay gipasanginlan nga burikat sa house detective nga niduol dayong sulod nila sa elevator, dili katabang sa iyang kawsa ang pagpakahilom human sa insidente.

O tingali, tinuod ang lain niyang pangangkon nga labihan niya kamapasayluon, nga nagpaabot siya nga mautingkayan ni Angie Saniel sa DYAB Radyo Patrol ang blotter sa Mabolo una nanalipod sa iyang kaugalingon.

* * *

Ang kahilom sa mga hingtungdan sulod sa tulo ka semana human sa insidente makapahiyos sa pasangil sa pamolitika.

Hunyo 20 ra untang nitiyabaw sa media ang taga WCCH kon gigamit pa sa mga kaatbang ni Mabatid; ug nitulisok si Mabatid nga sinugo sa iyang mga kaatbang ang taga WCCH.

Laing timaan nga makapasalig ni Mabatid nga dili pamolitika ning iyang kontrobersiya:

Si Cebu City Councilor Mary Ann Delos Santos, nga gikatahong nipaluyo sa iyang kaatbang pagka kapitan sa Mabolo ug kanhi kapitan sa Lahug, wa manghilabot sa insidente nga hagbay ra nga gipa-blotter sa ilang barangay hall.

* * *

(leo_lastimosa@abs-cbn.com)

NIñA MABATID
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with