EDITORYAL - Kadena sa drugas

Nakugang ang tanan, ilabi na dinhi sa Cebu, sa gidangatan ni SPO1 Adonis Dumpit nga napatay didto sa Bohol sa anti-drugs operation nga gipahigayon sa National Bureau of Investigation. Gisita unta siya sa mga ahente sa NBI kay gi-report nga nagdala siya’g shabu, apan misukol.

Kinsa may dili makurat nga nabantog man si Dumpit nga tarong nga pagkatawo, ug wa’y gikahadlokang mga kriminal. Naila siya dinhi sa Sugbo nga hilumon apan isog sa pagpatuman sa balaod. Sa laktud, berdugo siya sa mga kriminal. Dihang napriso kini tungod sa pagpatay sa menor de edad nga gipasanginlang tulisan, daghan ang nasagmuyo tungod lagi sa ilang pagkaila kang Dumpit nga usa ka tarong nga polis. Apan sa nahitabo kaniya karon nga gipasanginlang high-level drug pusher ug ‘narco-cop,’ daghang Sugboanon ang nakurat ug nasagmuyo sa iyang gidangatan.

Sumala pa sa kapolisan, nalambigit gyud si Dumpit sa ilegal drug trade. Apan bisan sa kadaghan na sa mga polis nga gipasanginlang drug protectors nga napatay sa mga anti-illegal drug operations, makapakurat gyud ang nahitabo ni Dumpit. Dili na siya makadepensa sa iyang kaugalingon aron itataw kon unsa gyud ang matuod.  

Sama sa ubang mga polis nga pareho niya og gidangatan, hayan nga walay madawat nga benepisyo ang iyang pamilya.

Wa’y laing mabasol sa gidangatan ni Dumpit, kon tinuod man kining akusasyon batok kaniya, mao ra gyud ang ilegal nga drugas. Dakong tanghaga usab karon kon kinsa kaha ang nagtental sa respetadong polis nga sama ni Dumpit nga nalambigit na man hinuon kini sa mga tawo nga kanhi iyang mga kaaway.

Kining tentasyon sa ilegal nga drugas, nakaguba sa kinabuhi dili lang sa kabataan, kon dili, hasta sab sa mga propesyonal ug bisan sa ubang tigpatuman sa balaod. Dako kining pasidaan ngadto sa mga wala pa makasuway niini, nga mas maayong dili na lang gyud suwayan aron dili kamo mabitik ug dili na hinuon makagawas sa kadena sa ilegal nga drugas.