Walay disiplina

Ang kahuot sa trapiko dili lang ikabasol sa kadaghan sa mga sakyanan kon dili sa kinaiya sa mga driver ug sa mga sumasakay.

Kagahapong adlawa niagi ko sa rotunda o kanang tuyokan nga karsada sa simbahan sa Guadalupe apan bisan udto na ug adlawng Domingo hilabihan gihapon ka huot sa mga sakyanan.

Nakasabot ko kay huot man ang karsada nga didto ra usab ang loading ug unloading ilabi na sa luyong bahin sa simbahan.

Apan sa unahang bahin nga luagluag na ang karsada mao ra man gihapon tungod kay sa tunga sa karsada man mohunong ang mga sakyanan maghulat pa gyud og mga pasahero.

Gani sa likoanan mismo mihunong ug namik-ap og mga pasahero.

Walay mapili sa mga driver ug mga pasahero nga walay batasan walay hunahuna nga aduna pa intawoy mga nagsunod. Bitaw nagtoo seguro sila nga Domingo walay manakop pero angayan hinumduman sa tanan nga ang balaod walay day off kon dili adlaw-adlaw kini gikinahanglan tumanon.

Pareho ra sa pedestrian lane nga wala gyud kaposlanan ma-pedestrian lane man o mga motorista.

Sa dakbayan sa Mandaue milabang ko sa pedestrian lane kugos nako akong anak atbang sa simbahan sa St. Joseph duol sa City Hall.

Pastilan imbes mohunong ang PUJ giserbatohan naman hinoon ko ug hapit na lang ligsan.

Kining ingon niini nga batasan sa mga driver walay luna sa dapit nga ang balaod gipatigbabaw kay dili man mosunod sa balaod.

Dili man hinoon tanan apan daghan gyud ang walay disiplina nga kinahanglan seminaron.

Nasayod na sila apan nagpakabuta-bungol ug gipatigbabaw ang ka walay batasan. Maayo sa Mandaue City kay motuman na ang mga tawo molabang sa pedestrian lane gyud kay mahadlok makamulta tungod kay estriktong gipatuman ang anti jaywalking ordinance.

Kong motuman lang unta ang katawhan sa simple nga lagda seguro wala gyuy problema. Kanus-a pa kaha madisiplina ang tanan, ayha na kon maputi ang kolor sa uwak.