Maayong sa dili pa mo-file of Motion for Reconsideration (MR) ang kampo sa gipatay nga si Ermita barangay captain Imok Rupinta kabahin sa hukom sa piskaliya nga nibasura sa kaso batok sa giingong mastermind, angay’ng lig-onon gyud nila kini pag-ayo.
Gibasura sa investigating prosecutor ang kasong murder ug attempted murder nga gipasaka sa kapolisan batok ni Winefredo Miro kay gihulagway nga pwerteng lugaka ug dili gyud makabarug kon ipugos kini pagpasaka sa hukmanan. Katungod sa pamilya ni Imok ang pagduso og MR, apan kinahanglang may bag-o sila nga ebidensya.
Bisan ako nga nakabasa sa affidavit nga nagtumbok ni Miro nga maoy mastermind sa pagpatay ni Rupinta, dili gyud makatuo niini. Sa wala pa patya si Rupinta kaniadtong Nobiyembre 23 didto sa Barangay Tayud, Liloan, kanunay nga motawag nako ang kapitan.
Wala gyud mahisguti ni Rupinta nga may katahap siya ni Miro nga mopatay kaniya. Mas gihisgotan pa gani niya ang tag-iya sa mga gambling machines nga iyang gipasakmit sa kapolisan nga posibleng maoy mobawos kay kuno mga gun-for-hire kining mga tawhana. Ang ngalan niining maong tawo naa man gani sa affidavit nga nakuha sa kapolisan gikan sa kapuyo ni Rupinta, apan nahibulong ko kon nganong wala man nila gi-pursue. Unya, giapil pa gyud si Mayor Tomas Osmeña sa kaso, mao nga misamot na gyud og kalikoy ang kaso.
Para kanako, bisan og estrikto nga pagkatawo kini si Mayor Osmeña, apan dili kini makaako pagpatay sa iyang kontra. Busa, awhag nako sa mga paryente ni Rupinta nga lig-ona gyud ninyo ang mga bag-o ninyong ebidensya kon nagplano kamo nga mosumiter og MR sa hukom sa prosecutor.
* * *
Tan-awon nato og unsa’y labok sa bag-ong regional direktor sa kapolisan dinhi sa Central Visayas batok sa mikuyanap nga problema sa drugas ug illegal gambling.
Sa panahon ni Chief Superintendent Robert Quenery wala ko’y reklamo sa kampanya batok sa ilegal nga drugas kay paspas man ug daghan sila og mga dinakpan ug ubay-ubay’ng drugas ang nasakmit.
Apan sa kampanya batok sa ilegal nga sugal, sama sa illegal swertres, video karera ug moli-moli, lugak kaayo ang kapolisan ug mora’g walay giya gikan sa regional headquarters.
Dinhi sa dakbayan sa Sugbo wala na mandoi ni higalang Senior Superintendent Joel Doria ang iyang kapolisan nga mopaspas sa kampanya batok sa illegal gambling machines.
Tungod niini, ang kapolisan sa Station 3, nagkiyugpos na lang sa midagsang nga video karera ug moli-moli diha sa likud sa karaang provincial jail ug sa Carreta. Ang Station 6 sab, nagpabaya na lang sa mga gambling machines ug illegal swertres sa Barangay Suba ug Pasil.