Operations vs. illegal V-Hire

Gimandoan gyud diay sa Malacañang ang kadagkoan sa Land Transportation Office (LTO)-7 nga mopaspas sa paghimo’g kampanya batok sa mga illegal transport vehicles nga nag-operate dinhi sa Sugbo.

Si LTO-7 Regional Director Victor Caindec maoy mitug-an kanako nga gimandoan siya ni Secretary Bong Go, ang special assistant to the president, nga aksiyonan dayon ang daghang reklamo nga nadawat sa Malacanang.

Ang opisina ni Presidente Duterte nakadawat diay og mga reklamo kabahin sa daghang ilegal nga transport vehicles nga nag-operate dinhi sa Sugbo ug bisan na gani sa mga silingang probinsya.

Didto sa Western Visayas, ang mga sakop sa Land Transportation Franchising and Regulatory Board (LTFRB)-6 nga gipangulohan ni Regional Director Richie Osmeña dugay na kaayong mipahigayon og paspas nga kampanya batok sa mga illegal transport vehicles.

Daghan na nga mga tag-iya og illegal transport vehicles ang nakamulta og P200 mil sa matag sakyanan nila nga nasakpang gigamit sa pagpamasahero nga walay permit sa LTFRB.

Matud ni LTO-7 Director Caindec nga ang iyang mga deputized agents nagsugod na sa pagpahigayon og paspas nga pagpanakop sa mga illegal transport vehicles.

Husto gyud kaayo ang gihimo ni Secretary Bong Go kay dugay na kaayong nagreklamo ang mga legitimate operators og mga transport vehicles batok niining mga ilegalista nga transport operators.

* * *

Nindot gyud diay nga kon may reklamo kita, idiretso nato ngadto sa Malacañang. Kon mao, maayo kay nakakuha na ko og ideya. Dugay na kaayo ko nga nagsige og hisgot sa mga illegal swertres operations ug sa pagkuyanap sa mga illegal gambling machines, apan wala kaayo aksiyoni sa kapolisan.

Pahimuslan nato ang higayon nga direkta na kitang makasumiter og report ngadto ni Bong Go, ug ni Secretary Martin Andanar sa Presidential Communications Office, ug tan-awon nato og dili ba gyud molihok ang mga higala nato nga kapolisan aron sumpoon kining maong mga ilegal nga kalihukan.

Sayonan ka, ang akong inpormer sa Barangay Carreta ug Tejero nagsige og report nga gibalik na usab ang mga video karera ug moli-moli sa Sitio Lawis, Pasil ug ubang dapit sa Barangay Suba.

Daghan kaayong mga gambling machines diha sa nasunogan nga bahin sa Sitio Lawis. Matud pa nga ang mga polis, mag-agi-agi ra man sa maong dapit.

Mga polis, ang report nga akong nadawat mao nga ang uban sa mga balay nga may gambling machines ang ilang Stephen ug Myka. Susiha kuno ninyo bi.

Unya, diha sa Sitio Ponce, Carreta, gibalik sab sa ilang Marilou, Elna, Ludy, Miriam. Ngano man gyud ni? Sa likod sa karaang provincial jail, mikatap sab ang gambling machines.