Hain ang kaso?
Nabanhaw na sab ang pasangil batok ni kanhi heneral ug karon Daanbantayan Mayor Vicente Loot nga kini nalambigit sa patigayon sa ilegal nga drugas.
Gilabhan og maayo ni Presidente Rodrigo Duterte si Loot atol sa iyang pagbisita dinhi sa Sugbo niadtong miaging weekend.
Sa pakigpulong sa presidente atubangan sa mga mayor ug ubang piniling bisita nga giimbitar alang sa usa ka tigom didto sa Waterfront Cebu City Hotel niadtong Biyernes sa gabii, gibalikas niya ug gibaharan si Loot.
Sumala sa presidente dunay lawak sa pinuy-anan ni Loot nga puno sa illegal nga drugas. Di malalis nga dunay “access” sa tanang intelligence report si Duterte, posibleng ang iyang gitug-an kabahin ni sa report nga iyang nadawat.
Apan ang dakong pangutana, unsa man ka kasaligan ang maong tinubdan? Gisusi na ba sa mga hingtungdang ahensiya sa gobyerno unsa ka tinuod ang maong kasayuran?
Kun tinuod man, nganong hangtud ron wala man kapasaka ang gobiyerno og kaso batok ni Loot? Pananglitan, ang gisulti ni Duterte nga dunay lawak sa panimay ni Loot diin gitipigan ang drugas, nganong wala may nahimo ang kapolisan ug ang Philippine Drug Enforcement Agency (PDEA) aron rondahon ang maong panimay?
Dili ba mas katuohan kon ang pasangil dunay suporta nga ebidensiya? Bisan gani sa pasangil nga ang retiradong heneral dunay daghang tinaguan nga katigayonan ug gidudahang gikan sa ilegal nga drugas way nahimo ang gobiyerno hangtud ron.
Wala pa silay kaso nga napasaka hangtud karon batok ni Loot. Apan bisan sa kapakyas sa gobiyerno pagtaral ni Loot sa hukmanan tungod sa mga pasangil, padayong nitoo si Duterte niini.
Sa akong tan-aw kumbinsido gyud ang presidente nga nalambigit si Loot sa ilegal, busa angayang hasion niya ang kapolisan, PDEA, ug ang Department of Justice nga pasakaan na og kaso si Loot.
Sa ingon niini nga paagi mahatagan sad ug kahigayonan ang mayor nga makapanalipod sa iyang kaugalingon sa husto nga dapit ug dili pinaagi sa “trial by publicity.”
* * *
- Latest
