Labing barato ug epektibo
Human sa kalibotanong kakugang sa Dengvaxia, ang bakuna nga inay makapanalipod sa mga pasyente gikan sa dengue makadugang na hinuon sa kahigayonan nga mataptan sila sa mas grabe nga dengue nga mahimo ganing mosangpot sa kamatayon, niay laing bag-ong kasayuran sa dengue nga makapatay-og sa Pilipinas ug ubang kanasuran nga padayong nahiagom sa katalagman.
Labing uwahing pagtuon nagbutyag nga ang katawhan nga way bisan unsa nga timaan nga nataptan sa makamatay nga sakit mao diay ang kasagaran nga mga tinubdan sa dengue. Nga sa labing uwahing ihap nakahasol sa dul-an sa 400 milyones ka tawo sa matag tuig.
* * *
Ang pagtuon sa University of Notre Dame sa Indiana sa Estados Unidos nagbutyag ning mosunod:
• Kapin sa 80 porsiyento sa mga pasyente sa dengue natakdan sa mga indibiduwal nga may kagaw na apan wa mopakita og bisan unsang timaan ug busa wa magpahiling sa mga doktor;
• Dul-an sa 25% sa mga kaso sa dengue gikan sa mga lamok nga nakapaak sa mga natakdan na sa kagaw apan wa pa magpakita og timaan sa sakit; ug
• Sa higayon nga mopakita na ang mga timaan, nilabay na ang kahigayonan sa pagbadlong sa pagkatap sa kagaw.
* * *
Ang mga tigpasiugda sa pagtuon nigamit og mathematical modeling pagsukod unsa kadaghan sa mga kaso sa dengue nga naggikan sa mga tawo kansang mga sakit wa pa mabantayi sa mga doktor ug mga tambalanan.
Ang kalibotanong kampanya batok sa dengue nga gipangulohan sa World Health Organization (WHO) nagsentro sa pagbantay sa pagsulbong sa sakit pinaagi sa pagsusi sa tanang gidudahan nga kumpirmado nga mga kaso sa dengue.
* * *
Gikabalak-an nga ang naandang mga paagi sa pagbatok sa dengue inutil sa pagpugong sa pagkatap sa kagaw gikan sa mga tawo nga wa pa mopakita og bisan unsa nga mga timaan nga natakdan na diay sila ug busa nahimo nang mga tinubdan sa makamatay nga sakit.
Human sa pagkabulilyaso sa binilyon ka pesos nga balor sa lapad nga pagpamakuna sa Dengvaxia sa Pilipinas ug ubang kanasuran, nibarug nga mas kasaligan nga paagi sa pagpanagang sa hulga sa dengue mao ang pagpanlimpiyo sa palibot. Gawas nga maoy labing epektibo, mao sab ang labing barato.
* * *
- Latest
