EDITORYAL – Miping-it na ang mga kabus

Dili na gyud mabangbang pa ang kanunay’ng pagsaka sa presyo sa mga produktong petrolyo. Ang labing ulahing pag-usbaw, kapin sa piso ang pagsaka sa presyo sa matag litro sa krudo ug gasolina.

Niabot na man unta kadto og P19 ang litro sa krudo sa hinapos nga bahin sa termino ni kanhi presidente Aquino, apan nagpunay na lang og usbaw ang presyo sa pagsugod na sa administrasyon ni Presidente Duterte.

Nisamot ang pag-usbaw diha nga gipirmahan ni Presidente Duterte ang TRAIN Law nga nagpahamtang og dugang buhis sa mga produkto, sama sa softdrinks ug ubang makaon, apan giapil ang fuel products.

Tungod niini, kanunay na lang nga adunay pag-usbaw sa produktong petrolyo. Mokunhod man tuod, apan pipila lang ka sentimos, dayon mosaka og balik nga labaw sa usa ka peso. Ang resulta, mosaka gyud pag-ayo ang presyo.

Gikan sa P19 ang litro sa krudo kaniadto, karon niabot na og P44. Dili gyud unta apilon sa pagpatuman sa TRAIN law ang mga fuel products kay ang resulta mosaka gyud pag-apil ang tanang palaliton.

Wala gyud kini mahunahuna sa mga finance managers ni Presidente Duterte nga ang ilang gihimo tabla ra og pagsakripisyo sa mga kabus nga maoy naglangkob sa kinabag-ang katawhan.

May usa tingali ka bentaha sa pagmahal sa presyo sa krudo ug gasolina kay kadtong mga wala’y ikasarang pagpalit og fuel, tingali dili na mopadagan sa ilang mga sakyanan ug makapamenos kini sa kahuot sa mga sakyanan diha sa kadalanan.

 Apan karon wala pa kini masinati kay daghan pa gihapong sakyanan nga nagpadayon sa pagdagan. Apan kinsa man kining adunay mga sakyanan? Sila ang mga arang-arang og kahimtang.

Ang mga kabus nga maglisud gani pagpalit og bugas nga ilang malung-ag kada adlaw mao gyud ang masakripisyo pag-ayo tungod sa kamahal na sa mga palitonon dala sa pag-usbaw sa presyo sa fuel.