Sunod-sunod ang pagpalagpot sa katungdanan sa mga opisyal sa kagamhanan human malambigit sa kurapsyon.
Bisan sa hugot nga kampanya sa administrasyong Duterte pagpuo sa kahiwian sa mga departamento sa gobiyerno. Lakip niini ang pagkanaug sa pwesto ni Wanda Teo isip secretary sa Department of Tourism tungod sa P60 milyones nga advertisement nga gibutang sa programa sa iyang mga igsuon nga usa ka blocktime program sa government run tv station.
Apan sa usa ka higayon gibutyag mismo sa presidente nga duna siya’y gitaktak nga miyembro sa gabinete tungod sa kurapsyon ug gituohan nga si Teo ang iyang gipasabot.
Ang mga kritiko moingon dayon nga mas hitak kuno ang kurapsyon sa kasamtangang panggobiyerno.
Apan kon atong tan-awon daghan ang nabutyag ug nangatangtang sa katungdanan nga opisyal tungod kay wala sila taboni sa presidente kinsa walay pagduha-duha sa pagtaktak sa mga gipangbutang niya sa pwesto bisan og loyal supporter niya.
Kon nalambigit kini sa kahiwian siguradong wagtang sa katungdanan.
Wala baliha sa presidente nga mamansahan ang iyang administrasyon tungod sa paglimpyo niya sa iyang nataran gikan sa mga basura nga naglibot kaniya. Dinhi nato makita unsa ka sinsero ang pangulo sa iyang tinguha pagpapas sa kurapsyon. Subo palandungon nga ang mga tawo nga gibutang niya sa pwesto ang mibitad kaniya sa kontrobersya.
Kon itandi nato sa nangaging mga presidente, wala kita makadungog nga dunay mga opisyal nga gipalagpot tungod sa isyu sa kurapsyon kaniadto.
Usa lang ang theory niini nga wala sila mahilabti tungod kay suod sila sa administrasyon
Labaw sa tanan nagpatigbabaw ang kahipokritohan nga mahadlok mo-reflect sa ilang liderato ang gihimong pagpangurakot sa mga tawong naglibot sa nangagi nga presidente.
Ang nakalahi ni Duterte sa iyang gisundan kay siya milaban sa katawhan sukwahi sa ubang pangulo nga ang ilang mga higala nga naa sa pwesto ang gidapigan.