Ni-resign na gyud sa hingpit gikan sa pagka-kalihim sa Department of Justice si Vitaliano Aguirre nga gidawat usab ni Pres. Duterte. Ang duha manag- fraternity brothers sa dihang sila nagtungha pa sa kolehiyo.
Nahimong kontrobersyal si Aguirre tungod sa mga gihulagway nga kwestyonable niining pagdala sa mga nagkadaiyang mga kaso, ilabi na sa mga kaso batok sa mga sakop sa oposisyon.
Daghan siyang mga desisyon ug mga gipangbuhat samtang siya pay kalihim sa DOJ nga nakapaisa sa kilay sa mga kritiko sa presidente, gani mismo si Cebu City Mayor Tomas Osmeña nakabangga usab niini tungod sa pipila ka mga isyu ug gihulagway sa mayor nga si Aguirre maoy makapaguba sa pangalan sa presidente.
Nakontrobersiya hasta ang kampanya kontra ilegal nga drugas ni Duterte dihang gibasura sa iyang buhatan ang mga kaso batok nilang Peter Lim, Kerwin Espinosa ug laing 16 ka mga personalidad nga gipanghinganlan ni Duterte nga maoy nagpadagan sa illegal drug trade sa Kabisay-an. Hinuon gimando niya ang pag-review niini og balik.
Hasta ang paghimong ‘state witness’ sa gibansagang Pork Barrel scam queen nga si Janet Lim Napoles nakapaisa usab sa kilay dili lang sa mga kritiko kondili hasta gani sa mga supporters ni Duterte.
Wa kaayoy nangahas kaniadto pagkwestyon sa iyang mga gipangbuhat kay mabutang man pirme nga “in the performance of official duty” ang iyang gihimo bisan og daghan ang wala makauyon.
Sa pagkakaron, kinsa kahay ibutang ni Duterte hulip ni Aguirre? Kon duna man, unta kadtong motan-aw pud sa interes sa katawhan ug sa nasud ug kadtong ligdong ang pagkatawo.
Kinahanglan nga ang molingkod nga kalihim sa DOJ motan-aw dili lang aron panalipdan ang partido sa presidente ug mga opisyales niini kondili ang hustisya gyud para sa kaangayan sa tanan ug dili sa indibidwal o personalidad.