Malipayong giangkon ni kanhi Cebu City Mayor Michael Rama nga nagkatagbo na sila ni Presidente Rodrigo Duterte didto sa dakbayan Davao niadtong Biyernes sa gabii, human sa taud-taod nga higayon niyang paningkamot nga mahinabi ang presidente aron personal nga ikapasabot ang pasangil nga siya usa ka drug protector.
Wala hinuon mohatag og detalye si Rama sa nahitabo atol sa ilang panaghinabi ni Duterte. Apan iyang gihulagway ang ilang tigom ni Duterte nga usa ka dakong kalamboan sa gipas-an niyang problema. Iyang gipasalamatan ang special assistant sa presidente nga si Secretary Bong Go nga maoy gikatahong nag-arrange aron iyang ikahinabi si Duterte.
Gipasabot ni Rama nganong dili siya ganahan modetalye sa nahitabo atol sa meeting. Matud niya nga agi kuno kini og respito sa presidente ug mas maayo kuno nga gikan mismo ni Duterte ang kasayuran.
Kon nagpaabot si Rama nga boluntaryong bakwion ni Duterte ang pasangil nga siya drug protector, tingali nasayop ang kanhi mayor. Wala maila si Duterte nga moangkon sa iyang sipyat.
Ug base sa kaugalingon nga pamahayag ni Rama, kadudahan duna ba gyuy klarong tigom nga nahitabo tali niya ug ni Duterte. Kon duna man, kadudahan sab kon naminaw ba si Duterte sa iyang explanation.
Sigun ni Rama, niadtong miaging semana didto siya sa Davao aron motambong sa convention sa Rotary Club isip presidente sa Rotary Club of Cebu Guadalupe. Sa akong nasabtan sa iyang pamahayag, si Duterte maoy nahimo nilang dinapit.
Ug atol sa maong kalihukan, natural gikahinabi ni Duterte ang mga opisyal sa Rotary diin usa nila si Rama. Atol sa maong tigom gikatupad niya si Duterte pinaagi sa tabang ni Bong Go. Kon mao ni ang tigom nga gipasabot ni Rama, imposible nga ang personal niyang problema maoy unahon og paminaw sa presidente.
Dili sab husto, ug alang nako wa’y respito sa presidente ug sa iyang mga kaubang opisyal sa Rotary nga isingit ang personal niyang problema diha sa tigum sa kadaghanan.