Dakong pagpakauwaw sa kapolisan ang gihimo ni PO3 Ritchie Saquilabon nga nadakpan sa mga sakop sa PNP Counter-Intelligence Task Force kay matud pa buot mangilkil og salapi gikan sa ginikanan sa ilang dinakpan nga suspek sa kaso nga robbery. Tungod sa iyang gihimo, giparelibohan ni Police Regional Director Robert Quenery ang tanang sakop sa Parian Police Station, apil na ang ilang hepe, ug gimandoan nga mo-undergo og refresher course.
Ang pagkasikop ni PO3 Saquilabon atol sa gipahigayong entrapment operations sa mga sakop sa counter-intelligence task force nahimo human nga ang ginikanan sa ilang dinakpan, midangop ug nangayo’g tabang. Posible pa nga dili ra kay si PO3 Saquilabon ang nalambigit niining mao nga pagpangilkil sa ilang dinakpan. Angay’ng palawman pa sa mga sakop sa counter-intelligence task force ang ilang pag-imbestigar niining maong kaso.
Mao kini ang kamatuoran nga ang pagpausbaw ni Presidente Duterte sa sweldo sa mga polis kay aron kuno dili na gayud sila matental sa pagpangilkil, wala gayu’y basehanan. Si PO3 Saquilabon nagdawat na og sweldo nga dul-an sa P35 mil ang buwan, kun kapin sa usa ka libo ka pesos ang adlaw, apan mihimo gihapon og pagpangilkil. Samtang angay usab siya nga hatagan og “due process” apan angay gayud siya nga taktakon sa pagka polis.
Ang mga polis nga ingon niini og batasan peligro kaayo nga magpataka lang pagpanakop, ilabi na kon matan-aw nila nga sapian ang tawo nga buot nila sikopon, ug dayon ilang panguwartahan. Ang nakabati lang sa atong balaod kay ang kaso nga robbery pinaagi sa extortion, gamay ra’g silot ug mahimo ra kini nga mapiyansahan.
Samtang dugay pa nga mahuman ang paghusay sa kaso batok kaniya diha sa korte, si PO3 Saquilabon mahimo pa nga makabalik sa serbisyo.
Unta, ang mga sakop sa PNP Counter-Intelligence Task Force mohingusog sa ilang pagpanakop sa mga badlongong polis nagsilbeng tunok sa PNP, apan kinahanglan usab nga moreklamo gyud ang mga hingtungdan nga buot kilkilan sa mga kurakot nga tinugyanan sa balaod.