Ang no-election scenario nga gipalutaw ni Speaker Bebot Alvarez agi’g pangandam sa kausaban sa sistema sa panggobiyerno gikan sa unitary ngadto na sa federal, dili gihapon makausab sa dagway sa Pilipinas kon mga tradisyonal nga politiko ang modumala sa federal ug rehiyonal nga kagamhanan.
Pananglit mahimo nga rehiyon ang Cebu ug silingang mga probinsiya, kon ang mga politiko nga modumala niini nangaraan na sa puwesto sukad pa niadtong 1980s, (ug may pipila nga politiko na daan panahon pa ni Marcos), nagtuo ko nga wala gihapo’y kausaban ang nasud.
Unang suliran nga atong gisagubang nganong nagreklamo kita sa kasamtangang sistema mao ang korupsiyon. Ang sistema sa panggobiyerno bukas kaayo aron makapangawat sa kuwarta sa kagamhanan ang mga opisyal, ug kining kawatang mga opisyal adunay duha ka klase – elected ug appointed.
Ikaduhang suliran nga atong gisagubang mao ang sistema sa pamolitika sa nasud. Ang resulta sa eleksiyon dili mao ang tinuod nga pulso sa katawhan tungod sa mga isyu sa pagpamalit og botos, terorismo (no vote, no water o no vote, ibot) sa mga botante, saad og trabaho, ug uban pa.
Si Presidente Digong Duterte nagpadungogdungog na nga basin og magpa-extend siya sa iyang termino. Dili kini imposible. Si Speaker Alvarez mismo ang mikonpirma nga basin og walay eleksiyon sa 2019. Usa sa mopakpak niini mao si Mayor Tomas Osmeña kinsa anaa na sa gahum isip mayor sa siyudad sa Sugbo sukad niadtong 1987.
Sukad nga nakalingkod siya, walay drainage masterplan ug traffic masterplan mao nga nagsige na ang baha ug trapiko sa siyudad sa Sugbo. Sukad kaniadto, si Tomas wala makaplano og epektibo nga mass transport system unya miproponer pa og BRT nga makapasamot og trapiko. Adunay ideya nga LRT kaniadto ni kanhi Kongresista Eddie Gullas, iyang gisalibay.
Sa ato pa, dakong tan-awonon nilang Duterte ug sa tenyente niyang si Bebot Alvarez ang tang-an nga mga politiko nga anaa lang nagpakabuhi sa politika. Bisan walay mga negosyo, pero nagbuy-od ang mga tiyan pinaagi sa kuwarta sa katawhan. Kon ipatuman ang federalismo sa nasud, likayan unta nga makadumala sa rehiyonal nga gobiyerno ang mga politikong nagpaburot sa puwesto.
* * *
Ang 1901st Infantry Brigade Ready Reserve sa Army Reserve Command mohimo og Brigade Conference karong Domingo sa alas 9 sa buntag sa conference room sa 7th Regional Community Defense Group sa Camp Lapu-Lapu.
Kini pagatambungan sa mga opisyal ug sakop sa maong Ready Reserve Unit nga gipangulohan ni Col. Erik Espina, anak ni kanhi gobernador sa Sugbo, Rene Espina.
Si Col. Espina gihugonhugonan nga iapil sa lineup pagka-konsehal sa south district sa PDP sa siyudad sa Sugbo ubos ni Bise Mayor Edgar Labella. Niadtong mga kanhi sakop sa Reserve Force, mahimo kamo nga moaplay og balik pinaagi sa pag-email sa 1901infantrybrigade.rr@gmail.com.