Imbes pabuto ug turotot, naghaguros nga baha ang misugat sa Bag-ong Tuig didto sa dakbayan sa Toledo. Lima ka barangay nga duol sa sentro sa siyudad ang gilunopan. Kalit kuno kaayo ang pagsaka sa tubig human mibundak ang uwan alas 4 sa hapon kaniadtong Disyembre 31, ug milungtad hangtud na sa alas 2 sa kaadlawon sa Enero 1.
Ang mga tawo, wala na nakapangluto alang sa ilang media noche kay nagkapuliki sa paghipos sa ilang mga butang aron dili mabasa, apan daghan gyud nga butang ang wala masalbar kay giabot man sa tubig.
Gipabakwit usab ang 204 ka pamilya sa nagkadaiyang evacuation center aron segurado nga walay dautang mahitabo kanila.
Ang giladmon sa tubig gikan sa taga hawak ug may lagpas pa gani sa tawo, apan dali ra usab milurang ang baha ug walay nakalas. Ang panag-abot sa miawas nga sapa ug tubig gikan sa bukid ang gitumbok nga hinungdan. Apan matud sa mga tawo nga tungod usab kadto sa drainage problem sa dakbayan.
Giangkon ni acting Mayor Antonio Yapha nga depektoso ang drainage sa Toledo og kasamtangan kining gitrabaho. Midugang siya nga ang problema sa basura nakatampo usab sa katalagman kay bisan asa ra man kuno molabay ang mga tawo sa ilang basura.
Gani wala man nila mapatuman ang balaod kabahin sa segregation sa mga basura, ug daghang tawo ang wala magpakabana sa resulta sa ilang binuhatan. Ang pagbaha dili lang mabasol sa “act of nature,” kon dili, ang binuhatan sa katawhan nga maoy nakaingon nga mi-react ang kinaiyahan aron pagpahigmata kanila.
Ang ingon niini nga panghitabo dili lang sa Toledo City, kon dili, sa tanang mga dapit nga anha na momata kon dunay katalagman, apan mobalik ra usab ug katulog inig ka human. Kini ang gitawag nga mga tawo nga dili gyud motagam.