Kumusta kamong tanan niining una nga adlaw sa pag-arangkada sa Bag-ong Tuig. Dako ang akong panghinaot sa tanan nga unta magmabungahon ang atong mga misyon ug ubang paningkamot sa kinatibuk-an nga tuig sa 2018.
Sa nakalabay nga tuig, mas alimuot ang dagan sa atong nasud. Sama sa gihapon, puno kini sa lantugi sa politika sa nasyonal man, o lokal nga eksena. Ma-administrasyon man, o anaa sa oposisyon, pulos wala gayud paalkanse ang isig ka kampo.
Kabahin sa kahusay ug kalinaw, naputos gihapon sa kontrobersiya ang operasyon batok sa negosyo sa ilegal nga druga. Padayon ang alegasyon sa extrajudicial killings batok sa kapolisan.
Kini bisan pa man sa pagkahagba sa pipila ka dagkong personalidad nga nalambigit sa druga. Sama sa gihapon, padayon nga gimaldisyon ang Metro Cebu sa nagkagrabe nga problema sa trapiko sa niaging tuig.
Bisan asa ang imo nga destinasyon, wala na’y lugar nga dili maghuot ang karsada. Tungod usab kini sa dagkong bul-og sa sakyanan nga nagdagan sa nagkahuot na nga mga karsada.
Hinuon, sa natad sa ekonomiya, padayon ang paglambo sa Sugbo sa niaging tuig. Grabe ang konstruksiyon sa mga highrise building alang sa pag-apas sa dako nga panginahanglan sa mga opisina tungod sa nagkadako nga sektor sa business process outsourcing ug uban pa nga negosyo. Ug maoy akong dako nga panghinaot nga niining pagpuli sa Bag-ong Tuig, mas daghang swerte ang moabot sa atong kinabuhi. Kini dili lang sa personal nato nga paglawig niining kalibutan, kon dili, lakip na sa pag-uswag sa panginabuhi sa kinatibuk-ang katawhan dinhi sa nasud.
Hinuon, akong nakita nga mas molambo pa ang ekonomiya sa Sugbo ug tibuok nasud niining tuiga. Kini gumikan usab sa dakong kumpiyansa sa sektor sa patigayon sa kapabilidad sa atong nasud pag-provide og daghang talento alang sa sektor sa pamuo.
Mao na nga atong iisa ang atong mga baso, alang sa dugang pa nga suwerte sa 2018. Malipayong Bag-ong Tuig kanatong tanan!