Nabaniog og maayo sa mga balita ug gipistahan sa social media kining mga hulagway sa kinamaguwangang apo ni Presidente Rodrigo Duterte nga nag-photo shoot sa sulod sa Malacañang.
Ang apo ni Duterte nga si Isabelle, anak ni Davao City Vice Mayor Paolo Duterte sa unang asawa nga si Lovelie Sangkola Summers, naghimo sa iyang pre-debut pictorials suot sa mga maanindot ug garbusong mga gowns nga siguradong dili hinimo og baratuhong stylists o sastre sa kilid-kilid.
Ang batan-ong Duterte mi-post sa iyang hulagway kauban pa ang stylist niini, ug matud pa sa report nga hasta ang stylist ni-post usab sa maong hulagway sa kaugalingon niining social media account. Wala pa motingog si Presidente Duterte ug ang amahan ni Isabelle nga si Paulo kabahin niini.
Usa sa gikwestiyon mao ang pagpakuha og hulagway nga gihimong background ang selyo sa Presidente sa Republika.
Matud pa sa report sa The Philippine Star, base sa Executive Order 310 sa panahon ni kanhi presidente ug karon Pampanga Representative Gloria Macapagal-Arroyo nga gamiton lang ang selyo sa pangulo ug sa bise presidente sa mga opisyal nga mga kalihokan agi og pagrespeto ug aron dili kini maabosuhan.
Apan ang tigpamaba sa presidente nga si Secretary Harry Roque misalikway dayon sa mga pagtuo nga may nalapas nga balaod ang pagpahigayon og photo shoot. Usa pa giingong nananghid silang daan subay sa protocol.
Dili lang tingali kay karon ra kini nahitabo sa panahon ni Duterte. Siyaro og sa nanglabay nga mga administrasyon walay apo o anak sa pangulo nga nagpa-picture ug gihimong background ang selyo sa pangulo sa nasud?
Dili siguro angay kalimtan nga ang Malacañang matawag nga official residence sa pamilya sa naglingkod nga presidente. Apan kon adunay naagrabyado, mas maayo tingali nga ipaagi sa pormal ang pagreklamo ug dili sa social media.