Karong nakonpirmar na ang pagkamatay sa tulo ka giisip nga dagkong lider sa teroristang Islamic State of Iraq and Syria dinhi sa Southeast Asia, nangahulogan ba kini nga mawagtang na kining hulga sa terorismo dinhi sa Pilipinas? Sagad sa tubag niini, dili pa gihapon. Tinuod ni nga dili pa matapos kining hulga bisan napatay na sa gobiyerno sila si Isnilon Hapilon, Omar Maute ug Dr. Ahmed Mahmud, ang Malaysian jihadist financier nga nagpundo ug nag-recruit og foreign fighters padulong sa Marawi City.
Nisulbong kining kagubot sa Mindanao kaniadto pa. Kon si Presidente Duterte pa maoy pasultihon, tungod kini sa dili patas nga pagtagad sa gobiyerno kaniadto sa mga Pilipinong Muslim, mao nga daghan kanila ang nabiyaan na g’yud sa paglambo sa ubang mga etnikong pundok sa mga Pilipino. Wa’y ganahan nga mausab pa ang nahitabo sa Marawi City. Bisan si Duterte, nga anaa kaniya ang tanang gahum, misaad nga dili na g’yud niya kini gusto nga masubli pa.
Samtang lisud kaayong dawaton, apan gikinahanglan kadtong buhaton ang makalilisang nga gubat aron ipakita, dili lang sa taga Marawi City kondili, sa tibuok Pilipinas nga dili motugot ang gobiyerno nga adunay mga grupo nga mohulga sa atong kalinaw. Karong napaabot na ni Duterte ang mensahe ngadto sa mga gusto pa gihapong motisok og kahadlok, kasakit ug dugang pag-antos ngadto sa mga Pilipino, panahon na nga ipakita usab sa gobiyerno ang mapinanggaon niining papel sa katawhan.
Ang rehabilitasyon sa Marawi City dakong hagit ug maoy magsilbi nga eksperimento ni Duterte aron ipakita nga husto siya, samtang sayop g’yud kadtong gisundan niyang mga administrasyon, ilabi na kabahin sa rehabilitasyon sa mga biktima sa katalagman nga Yolanda. Anhi makita kon tinuod ba o dili, ang mga pagsaway kaniadto sa administrasyong Aquino, kay usa man kadto sa mga palpak sa nakalabay nga administrasyon. Kinahanglang tarungon kini paghimo sa gobiyerno aron dili na madugangan pa ang mga diskuntento sa pangagamhanan.