Swerte kaayo kadtong gitugahan og maayong pangutok kay dali ra makasabot ug makamemorya. Apan matud pa, wala’y tawo nga bogo basta maikagon lang sa pagtuon aron makakat-on. Sa pagkakaron, segun sa mga batid nga sikolohista, nahimoan na ni og mga pagtuon aron sayon kita makamemorya.
* Paghunong sa tahas nga dunganon (stop multi-tasking) — Sagad nahimo na nga kinaiya, aron daghan og mahimo, halos dunganon ang tanan nga buot buhaton. Mao nga nagkayamukat ang resulta, wala’y maayong resulta, kon unsa na’y nahimo naglisud sa pagtimaan sa gipanghimo.
Ang utok, sagad nagkinahanglan og walo ka segundos nga dedikasyon nga matutokan ang usa ka butang, aron makuha ang pagmemorya sa usa ka tipik sa kasayuran. Sulayi kuno nga ibulag ang konsentrasyon, makasabot ka ngano nga sayon mawala ang yawe, samtang nagtubag ka sa selpon.
* Aninawon o ihulagway sa hunahuna (visualize) — Mas dali o lig-on kini kaysa panungog o sa pagsulti. Kinahanglang pahimuslan ang katin-aw sa paghulagway sa tinuod nga kinabuhi o diha sa imong hunahuna. Kon mahimo, mas maayong sabton nga ilangkob ang paghulagway niini sa atong panumdoman.
* Paghimo’g gimbuhaton nga tultolon (build a routine) — Posible nga duna ta’y maayo o dautan nga kinaiya, nga mahimo sa kinabuhi kada adlaw, ug abilidad sa pagtrabaho niini nga 100%. Tan-awon kon makaila ba kita sa aspeto kada adlaw, nga mopatipas sa naandan mo nga gimbuhaton, ug unya himuon ang pag-angay nga makorihean. Dinhi mohait ang atong memorya.
* Ihan-ay ang mga prayoridad — Ang kondisyon nga mapahimutang ang mga prayoridad, maoy gikinahanglan sa sayon nga pagmemorya. Matud sa Psychology of Learning & Behaviour. Makatabang ang pagsulay sa usa ka konsepto.