Brgy Lajog, Clarin, Bohol
“Among ireklamo kining konsehal namo sa lungsod kay namutol man og mga kahoy bisan og wa’y permit gikan sa DENR, unya dili pa g’yud ilang yuta.”
Brgy Talamban, Cebu City
“Moreklamo ko bahin sa usa ka baboyan diri sa Sitio Cadahuan kay baho ug kuyaw kaayo nga daghang magkasakit. Ang piggery man gud naa ra mahimutang sa daghang kabalayan.”
Brgy Mambaling, Cebu City
“Naunsa na man intawon ang tubig namo diri sa Alaska, wala na may agas-agas sukad pa niadtong buwan sa Mayo. Maayo unta og maaksiyonan dayon kini sa taga MCWD kay makahibulong man ngano nga wa’y agas diri sa amoa nga kanunay man magbunok ang uwan.”
Brgy Pusok, Lapu-Lapu City
“ Kaming mga mananagat diri sa among lugar luoy na kaayo kay wala na’y makuhang isda tungod niining mga liba-liba nga maoy nakaguba sa mga gasang diring dapita. Maayo unta og molihok na pagbalik ang Bantay Dagat kay ilegal man ang ingon niini nga panagat.”
Brgy Basak, Lapu-Lapu City
“Amo nga ireklamo kining tigkuha sa mga basura sa among barangay kay mag-eskedyul og alas 7 sa gabii, pero kadlawon na lang wala g’yuy miabot nga garbage truck. Tagbaw intawon kami og pinaabot sa wala. Ang nakapait pa g’yud kay ipabalik man ang basura sa among balay nga bug-at kaayo.”
Brgy Luyang, Carmen, Cebu
“ Wala na g’yuy klarong agas sa tubig diri sa among lugar, kon naa man gani, lubog kaayo unya hinay pa g’yud. Kami na man hinoon ang naproblema sa tubig nga namaligya pa man gani ang among lungsod og tubig sa dagkong kompaniya gikan sa kaulohan.”
Brgy Bunga, Toledo City
“Hangtud karon wala pa man gihapo’y patubig nga naabot diri sa among barangay, luoy kaayo ang mga nagpuyo diri. Asa na man intawon ang among mga opisyal sa barangay, kanus-a pa man sila molihok para matabangan ang mga tawo.”
Brgy Guadalupe, Cebu City
“Naa lang ko’y ireklamo bahin sa Guadalupe Elementary School kay daghan na kaayo ang mga bata nga nakawatan og mga bag pero wala g’yud sila’y gihimong aksiyon. Mas maayo unta og mabutangan og CCTV ang maong eskwelahan para mailhan kinsa ang mga kawatan.”
Brgy Canjulao, Lapu-Lapu City
“Diri sa among barangay kay nagpundok na lang ang mga basura kay wala g’yud kuhaa sa mga garbage collectors. Wala man sab molihok ang mga opisyal namo diri sa barangay para makuha na kining mga basura nga napasagdan lang.”
Alang sa inyong mga reklamo text lang sa 09083006702
- Latest
