Kahaw-ang kini ang kahulogan kun maghisgot ta og shunyata. Mao nga dinasig ning maong panlantaw ang akong lawak akong gihan-ay aron mamahimong haw-ang. Ug tuod man human sa hataas nga proseso nahimong haw-ang tuod ang tanan ug nakatulog ko nga malinawon inubanan ang pagmata sa sayong kabuntagon kuyog sa mga langgam ug sa mga manok nga motuktugaok. Bitaw, ang kinabuhi karon stressful kaayo tungod kay daghanan kanato ang nahimong ginapos sa mga hunahuna ug mga balansayon nga way pulos. Nahikalimot kita nga ang tanan nagasukad ra gyud sa kawalay ato nga tungod niini di maayo nga magpagapos kita sa bisan unsang makapahilayo kanato sa kalinaw. Ang kalinaw dili lang usa ka pangindahay. Ang kalinaw usa ka panaw.