Nagpataka lang g’yud pagpili og mga tawo ang mga sinaligan ni Mayor Tomas Osmeña nga ilang gipatrabaho sa Cebu City Hall ug sa lainlaing mga departamento niini. Apil ang mga tiggamitan og gidiling drugas ilang gipatrabaho sa siyudad.
Salikwaot kaayo kini tan-awon nga ang mga kawani sa kagamhanan mao unta ang magsilbe nga ehemplo sa katarong ug salamin sa ubang mga kawani, apan sila na hinoon ang nagpakita og salawayong binuhatan.
Angay’ng sutaon ni Mayor Osmeña kon kinsa ang mga nagrekomendar sa mga kawani nga namatud-an nga positibo sa paggamit og ilegal nga drugas aron dili na kini saligan sa pagpili og mga kawani nga kuhaon sa dakbayan.
Dalaygon hinoon ang kamandoan ni Mayor Osmeña ngadto sa personnel officer sa City Hall nga kadtong mga kawani nga mamatud-an nga tiggamitan og gidili nga matang sa drugas, taktakon g’yud dayon sa serbisyo.
Kinahanglan nga ang mayor dili g’yud magpadala sa hangyo sa iyang mga sinaligan nga maoy mga padrino niining mga kawani nga drug user. Kadto usab nga mga kawani nga nahibaw-an na nga tiggamitan diay og gidiling drugas, angay sila nga mauwaw ug mas labing maayo nga dili na maghuwat nga malutsan pa og termination papers.
Ang pagka positibo sa drug test sa unom ka kawani sa PROBE Team, nagpakita lang nga mao diay’ng wala kaayo sila’y agi sa paghawan sa mga gubot nga aseras ug mga karsada, kay daghan man diay sa ilang mga sakop ang naulipon sa drugas.
Ang mga kapitan sa barangay susama ra g’yud unta og baruganan sa mayor nga kon may mga sakop sila nga masakpan nga positibo sa drug test, ila dayon nga tangtangon sa trabaho kay kon pasagdan ra nila, makaagni kini sa uban nga mosunod sa ilang lakang.