Ang luod ug makauuwaw nga pagka “under-the-bunal” sa kadagkoan sa Land Transportation Franchising and Regulatory Board (LTFRB) sa gamhanang cartel sa taxi operators sa kaulohan, maoy tinuod nga hinungdan sa agresibo nila nga pagpanggukod sa Uber, Grab ug ubang alternatibong mga sakyanan.
Kapila na ka mabiktima sa mga taxi nga manlubag, mangisnab ug manikas apan nasiyam-siyaman og pinaabot nga matabangan sa LTFRB, kana kon naatiman man? Apan diha nga nitiyabaw ang taxi operators sa hulga sa ilang negosyo, mora og gisilian ang taga LTFRB nga nanghasi sa Uber, Grab ug ubang mapangahason.
* * *
Dili ta moadto og layo. Usa sa labing nangalisbo nga konsabo tali sa LTFRB ug taxi operators nahitabo dinhi sa atong kaugalingong tugkaran: Adunay 2,000 ka kolorum nga taxi units dinhi sa Sugbo ang gitugotan sa kurakot nga opisyal sa LTFRB (nga dili lang nganlan kay patay na ug dili na makapanalipod sa iyang kaugalingon.)
Nabisto ang binuang sa isog nga opisyal nga nakapuli sa katungdanan. Iyang nasakpan nga peke ang mga dokumento sa rehistrasyon. Napamatud-an ang anomaliya sa audit team nga gipadala sa ulohang buhatan sa LTFRB.
* * *
Inay malipay ang taxi operators sa Sugbo nga nasakpan ang 2,000 ka kolorum nga taxi units nga dili makiangayon nga nakigribal sa ilang negosyo, labihan nila nga hiloma. Wa g’yud sila makahunahuna og pahalipay sa opisyal nga isog nga nanalipod sa kaligdong sa industriya.
Sama sila kahilumon dihang kalit lang nga natangtang ang opisyal. Siya na hinuon ang nawagtang sa Sugbo samtang padayon nga nagwarawara sa kadalanan ang mga kolorum nga iyang nasakpan.
* * *
Ang kahilom sa taxi operators sa Sugbo, naribalan lang sa kamingaw sa LTFRB. Wa’y “ek” sa peke nga rehistrasyon sa kolorum nga mga taxi, ni sa pagkalagpot sa opisyal nga nakabutyag sa binuang.
Hangtud nga nikumpisal ang pangulo sa taxi operators sa Sugbo nga nakumbinser diay nila ang nasudnong mga opisyal sa LTFRB nga tugotan na lang ang kolorum nga mga taxi kay nakabuylo na sa ilang operasyon.
Wa’y bisan usa nga nahibulong diha nga nabisto, human sa pila ka adlaw, nga ang mga tag-iya sa 2,000 ka kolorum nga taxi units mao ra sab ang mga pangulo sa kahugpongan sa taxi operators sa Sugbo.
* * *