Dinhi sa Sugbo, may mga opisyal sa pipila ka lungsod nga gidungog nga nalambigit sa negosyo sa gidiling drugas. Tingali, isunod sila pagronda sa kapolisan, sama sa gihimo kagahapon kang Ricky Ramirez, kanhi mayor ug karon konsehal sa lungsod sa Medellin.
Wala hinoo’y nasakmit nga shabu gikan sa balay ni Ramirez diha nga gi-raid kini sa kapolisan sayo kagahapon sa buntag. Apan daghang armas, pipila niini walay mga lisensya, nga nasakmit gikan sa iyang gipuy-an.
Ambot kon tinuod ba ang gitug-an sa kapolisan nga si Ramirez nalambigit g’yud sa pagpamaligya og gidiling drugas. Kon nakadawat man og report ang kapolisan nga si Ramirez nalambigit g’yud sa pagpamaligya og drugas, ngano nga wala man nila aplayi og search warrant kabahin sa drugs?
Ang search warrant nga gikuha sa kapolisan gikan sa hukmanan nag-ingon ra nga gusto nila nga rondahon ang balay sa kanhi mayor kay nagtipig kini og armas nga walay lisensya. Buyno, panid-an nato kon unsa’y hukom sa Cebu Provincial Prosecutor’s Office.
* * *
Bahin sa ubang mga opisyal dinhi sa Sugbo, apil ang pipila ka mayor ug mga opisyal sa barangay, nga gikataho nga nalambigit sa gidiling drugas, kinahanglan sila nga kampanyahan pag-ayo sa mga polis kay giabusohan nila ang pagsalig sa katawhan ngadto kanila.
Walay uwaw kining mga tawhana. Nagpatugatuga’g lansar aron kunohay manerbisyo sa katawhan, apan gusto diay nila nga dauton ang ilang kinabuhi pinaagi sa pagpayuhot og gidiling drugas.
Tiaw mo? Kadtong gidakop nga kapitan sa usa ka barangay sa Badian, mikalit lang pagkadato diha nga ang iyang bana napriso didto sa New Bilibid Prison sa Muntinlupa City. Nakapalit na hinoon og mga sakyanan ug niasenso nga nakapatingala pag-ayo sa ilang mga silingan.
Dasigon nato ang kapolisan nga gipangulohan ni Chief Supt. Jose Mario Espino nga mopaspas pa sa paghimo’g kampanya.
* * *
Pastilan, kining nagkadaghan nga binilanggo nga nagpunsisok na diha sa atong mga bilanggoan, nakapaut-ot kini sa atong pundo sa kagamhanan. Mosamot kadako ang gasto sa kagamhanan alang sa pagkaon sa mga binilanggo.
Sigun sa report sa Commission on Audit (COA) nga nagkuwang gani ang budget sa kagamhanan tungod sa kadaghan na sa mga piniriso nga naghuot na karon sa atong mga bilanggoan sa nasud.
Nakalimot ko sa kinatibuk-ang gasto sa pagkaon lang sa mga piniriso, apan naglambigit kini og bilyon ka pesos. Unya ang kantidad nga nadugang sa gasto sa pagkaon sa nagkadaghang piniriso niabot og kapin sa P40 milyones.