EDITORYAL - Ilegal dili suportahan

Nindot kaayo ang baruganan sa Cebu Chamber of Commerce and Industry (CCCI) kabahin niining mga Transport Network Vehicle Services (TNVS), sama sa Grab ug Uber, nga mikatap na karon dinhi sa Metro Cebu. Isip presidente sa kahugpongan sa mga magpapatigayon sa Sugbo, si Melanie Ng miingon nga gisuportahan sa CCCI ang mga tawo nga namatigayon pinaagi sa Transport Network Vehicle Services pinaagi sa nindot nga serbisyo sa transportasyon.

Apan samtang gisuportahan sa kahugpongan sa mga magpapatigayon ang Grab ug Uber, ilang gitataw nga wala sila mosuporta niadtong mga nagpadagan og mga sakyanan nga gigamit sa pagpamasahero bisan og wala sila’y permiso gikan sa kagamhanan. Ang Land Transportation Franchising and Regulatory Board (LTFRB) maoy gitugyanan sa paghatag og permiso sa mga sakyanan nga mahimong gamiton sa pagpamasahero, apan dinhi sa dakbayan sa Sugbo daghan kaayo nga mga tag-iya og sakyanan nga igo lang nagpa-accredit sa Uber ug Grab, wala na mokuha og permiso sa LTFRB, apan sila namasahero na.

Nakabaton og kaisog ang mga tag-iya niining maong mga sakyanan bisan pa man sa kadagko sa multa nga gilatid sa kagamhanan kon sila madakpan kay ang LTFRB ug Land Transportation Office (LTO) nagkyugpos lang ug wala manakop sa mga kulorum. Daghan ang nagduda nga gilawgan ang mga tawo nga gitugyanan sa pagpanakop sa mga nagpadagan og kulorum nga mga sakyanan nga gigamit sa pagpamasahero.

Si Mayor Tomas Osmeña mipadayag og baruganan nga gisuportahan niya ang mga tag-iya og sakyanan nga gigamit nga pasaheroan bisan og wala’y kompleto nga papeles. Nakalimot ang mayor nga dihang midaog siya ug nanumpa sa katungdanan, ang tuo niyang kamot iyang giisa dungan sa pagpasalig nga ipatuman niya ang tanang mga legal nga balaod.