Karong adlawa gibalik pagsalom sa search and retrieval team ang kadagatan sa Dakbayan sa Lapu-Lapu diin gilabay ang lawas ni Bien Unido Mayor Gisela Boniel.
Kini nunot sa hangyo sa pamilya sa mayor nga ipadayon ang pagpangita niini human gihunong na unta ang retrieval operation niadtong nakalabay’ng semana human dili na maabot sa pagsalom sa mga divers ang kinalawman nga bahin sa dagat.
Apan gimando ni Chief Supt. Noli Talino ang pag-resume sa retrieval sugod karong adlawa nga molanat sa usa ka semana.
Gani niadtong Sabado mipahigayon og misa ang kapolisan ug kabanay sa mayor uban ang duha ka mga saksi sa krimen didto sa lawod sa Isla sa Caubian.
Maayo man nga ipadayon ang retrieval aron mahatagan og desenteng paghipos ang lawas ni Mayor Boniel.
Gawas pa mas molig-on ang kaso batok sa mga akusado kon makita ang lawas niini. Apan ang pangutana karon aduna bay igong katakos ang kahimanan sa mga divers sa pagsalom sa 500 feet nga gilawmon sa dagat?
Sa unang kinse ka adlaw nga pagsalom nila sa kadagatan nasuhid na nila ang Caubian, Olango island ug apil na sa Punta Engaño apan pakyas sanglit kutob ra man sa 200 feet ang ilang maabot.
Maayo unta kon dunay magpagamit og mas hightech nga diving equipment aron maabot gyud ang kinalawman sa dagat ug makuha ang ilang gipangita.
Hinaut pa unta mapalgan na ang lawas sa mayor kon tinood man nga sa lawod sa Lapu-Lapu gilabay kay basin baya og sa laing dapit gihagbong. Na, mahulog lang unya nga nangita sila sa wala.
Hinaut nga positibo ang resulta sa retrieval operation.