Ang Okra kumon na kini nga isagol sa mga lamiang potahe nga may utanon sama sa chopsuey ug uban pa. Kini ang klase sa utanon nga giisip sab nga prutas basta may liso lumad kini sa Afrika. Motubo kini sa tropical o init nga lugar sama sa atong nasud nga bisa’g dunay dapit nga bugnaw, apan naglabi ang panahon sa kainit.
Nagbaton og nutrisyon ang Okra, sama sa protina, carbohyrates, fat ug fiber. Maayo sab kini nga tinubdan sa vitamin-C, folate, vitamin-A ug magnesium.
Duna sab ni katakus nga manalipod sa lawas gumikan sa iyang anti-oxidant ug anti-inflammatory. Makapaalibyo gihapon kini sa hubak o pagpagaan sa ginhawa ug pagpanalipod nga dili taptan sa sakit sa cataract ug makapalig-on sa sistema sa imyun.
* Ang laputon (mucilage) o espisohon nga duga sa okra ug ang fiber niini makatabang pagminten sa maayong lebel sa bloodsugar nga moayuda sa pagpatuhop ngadto sa selyula nga aron dili magpundo ang asukar sa dugo.
* Daghan kini og kalidad nga epektibo mopahimsog sa mga kutay sa sulod sa ginhawaan (internal organ), ilabi na sa atong tinai.
* Makatabang ang Okra, nga tuhopon sa lawas ang himsog nga tubig ug babagan nga santaon ang subra nga makadaot nga kolesterol, metabolik toksins, ug subra nga apdo (bile) aron kini ikalibang. Tungod sa naglabi nga tubig sa okra makasanta kini sa konstipasyon, pangutot ug butod sa tiyan kay wala kahilisi.
* Maayo sab kini nga pamenos sa subra nga timbang ug daghan pa nga mga benepisyo sa kahimsog basta lutoon kini nga pahinayan sa kalayo nga dili lataon, aron magpabilin ang mga esenyal nga nutrens.
* Makahimo usab kini sa pagprodyus og mga maayo nga bakterya, aron dili dauton o luyahon ang lawas batok sa mga ‘free radikals’.