Sukad sa sinugdanan, nagkasungi ang mga sulti nila ni Presidente Rodrigo Duterte ug sa kadagkoan sa Armadong Kusog mahitungod sa krisis sa Marawi City:
Dihang nideklarar dayon si Duterte og martial law sa tibuok Mindanao pila ka oras human niatake ang Maute group sa pipila ka bahin sa Marawi, nipahibawo si Defense Secretary Delfin Lorenzana nga wa siya mohimo sa rekomendasyon;
Samtang nagsubli-subli pagpasalig ang militar nga hapit na masulbad ang krisis, si Duterte nagsige og pasidaan nga ang kaguliyang mahimong mokatap ngadto sa ubang bahin sa nasud;
* * *
Sa usa ka bahin, gitataw sa militar nga ang Maute group mahimong nagpapapel lang aron makadapit sa pagtagad sa liderato sa ISIS sa panghinaot nga makakuha og dakong suporta gikan sa langyaw’ng mga terorista, apan sa pikas bahin gitunglo na ni Duterte ang Maute group nga sumpay na sa tinai sa ISIS; ug
Human gitataw sa militar nga wa pa’y ebidensiya nga nakasulod na ang ISIS sa Mindanao, si Solicitor General Jose Calida nipahibawo sa Korte Suprema nga dili lang usa, dili lang duha, kondili 20 na g’yud ka grupo sa ISIS ang naglihok karon sa Mindanao.
* * *
Samtang naningkamot ang militar pagpahiyos sa problema sa Marawi, nga wa’y katakus ang Maute sa pagtukod og base sa ISIS sa bisan asa nga bahin sa Mindanao, sukwahi ang mga pangangkon ni Duterte.
Nipasidaan siya nga duol ra ang Kabisay-an sa Mindanao ug mahimo gani nga moabot ang Maute sa Luzon busa mahimong ideklarar ang martial law sa tibuok nasud.
Diha nga mingaw ang suporta nga nadawat sa posibleng pagpalapad sa martial law, nihudlat si Duterte nga mahimong moulbo ang gubat sibil sa Mindanao.
* * *
Mga eksperto sa terorismo nagduda na nga gimaniobra sa pamunoang Duterte ang pagpaburot sa problema sa Marawi. Mao nga inay dasonan ang mensahe sa pagpakalma sa militar, nagsige og bandilyo nga angay’ng lubat-lubatan ang katawhan kay nameligro sab ang ubang bahin sa nasud.
Nisamot ang mga pagduda nga wala magsulti sa kamatuoran ang pamunoang Duterte diha nga gibisto sa mga eksperto nga giapil ni Calida paglambigit sa ISIS ang mga pundok nga wa na maglihok, ug ang nagkalainlaing mga ngalan sa usa lang ka pundok.