Nakaani og managlahi nga reaksyon ang higpit nga pagpatuman sa Department of Transportation sa Anti-Distracted Driving Act (ADDA), ang Republic Act 10913.
Gawas sa pagdili sa paggamit og communication gadgets sa mga magmaneho og sakyanan, giapil usab sa pagdili ang pagbutang og mga accessories sa dashboard. Bisan og wala kini malakip sa ADDA, apan gisukip kini sa probisyon sa Joint Administrative Order JAO 2014-01.
Lakip sa gidili mao ang pagbutang og rosaryohan nga ibitay sa rear view mirror sa sakyanan ug ang mga imahen sa Santos nga ibutang sa dash board.
Nakapasaka kini sa kilay, ilabi na sa mga Katoliko kay kuno ang mga imahen nagsilbe nga giya o ilang proteksyon panahon sa biyahe.
Gani, ako mismo, nagbutang man usab og rosaryohan sa rear view mirror, nga sa dili pa ko mopadagan sa sakyanan mohikap ko sa rosaryohan ug manguros, dungan sa pagpangaliya nga iiway ako sa disgrasya, ug ang mga tawo nga akong maagian.
Apan may balaod na nga nagdili niini, busa angayan kita nga mosunod. Akong na-realize nga ang rosaryohan gidesenyo kini aron gamiton sa pagrosaryo ug isul-ob sa lawas sa tawo.
Wala kini gigama aron himoon nga dayan-dayan sa sakyanan. Sa tinud-anay lang, sa pila ka tuig nga nagbitay ang rosaryohan sa rear view mirror sa atong sakyanan, ato ba kining gikuha ug gigamit sa pagrosaryo?
Segurado ko nga wala, kay gilawa-lawaan ug napuno na sa abog ang rosaryohan kay wala gamita sa driver. Mahinumdoman lang kini sa paghikap kun hapit na madisgrasya. Dili nato gamiton nga argumento nga mao nay naandan natong mga Katoliko ang pagbutang sa rosaryohan sa sakyanan, kay kita mismo nasayod nga dili kini angayan natong himoon, ilabi na kun dili ka magrosaryo.