Angkunon man o dili, kining pag-abot ug pagsamok sa Abu Sayyaf dinhi sa Central Visayas, aduna gyuy dili maayong epekto, ilabi na sa natad sa turismo. Ang mga tinugyanan sa turismo sa nasud pirme lang nangangkon nga wala maapektohi ang tourism industry sa rehiyon human sa nahitabo sa Inabanga, Bohol.
Dungan niini ang pasalig gikan sa mga security agencies sa gobiyerno nga luwas ug lig-on ang seguridad sa rehiyon aron panalipdan ang mga langyaw nga gustong mosuroy dinhi. Apan sumala pa sa usa ka report sa ABS-CBN News.Com, adunay 400 ka Japanese tourists nga nikanselar sa ilang biyahe padulong sa Cebu, human sa nahitabo sa Bohol.
Matud pa, ang maong inpormasyon gikan sa usa ka inila nga travel agency nga nagbase didto sa Manila. Kining ingon niini nga mga report, dili angay’ng ipaka wala’y-bili. Hunahunaa nga kining 400 kun manabi sa ilang mga kaila nga potensyal nga turista sa Pilipinas, dako kini og epekto.
Japanese pa lang kini, wa pa’y labot ang ubang potential tourists nga mga Koreans, Chinese, Amerikano, Russians ug uban pa nga makatampo unta og dako sa turismo sa rehiyon.
Angay hinumdoman nga daghang pamilya ang nabuhi tungod sa turismo. Ang kada turista nga moanhi, nagdala gyud og kuwarta nga mapunta sa katawhan.
Karong may mga ingon niini nga report, kinahanglang motabang ang mga local government units ug dili pasagdan o magsalig lang sa national agencies aron matabonan kining bati nga balita bahin sa tibuok rehiyon. Kinahanglang maghimo og daghang kalihukan aron ikampanya ang kanindot sa Central Visayas.
Sa samang paagi, magpreparar usab ang kapolisan og mga pamahayag nga mosakay sa kampanya sa turismo nga dili makapaalarma o makapahadlok paminawon sa mga tawong makadungog, ilabi na sa mga potensyal nga turista.