Mas maayo diay nga kanunayon ang paghimo og summit sa mga lider sa Association of Southeast Asian Nations (ASEAN) dinhi sa Sugbo kay moresulta man kini og pagpanglimpyo sa atong palibot.
Daghan ang natingala ngano nga kalit lang nangahanaw ang mga Badjao nga sagad unta makita diha sa Gorordo Avenue nga magpakilimos sa mga motorista. Wala na usab ang mga makililimos diha sa Pope John Paul II Avenue.
Ang rason diay kay ang maong mga makililimos nga giisip nga makapuling sa mga mata sa mga bisita, gipanghipos sa kagamhanan ug sila gipahiluna sa karaang ihawan sa dakbayan sa Sugbo didto sa North Reclamation Area.
Ngano nga himoon ra man kini sa kadagkoan sa kagamhanan kun adunay mga bisita gikan sa laing kanasuran? Ang gihimo sa atong mga opisyal, susama ra sa gihimo sa usa ka tagbalay nga hugawan nga manglimpyo lang sa ilang palibot kun magsaulog sa piyesta.
Kagahapon, bisan og nagtaligsik apan walay hunong ang mga garbage collector sa paghakot sa mga basura, ilabi na duol sa Marco Polo Plaza Hotel, sukwahi sa ubang mga adlaw nga dugay kaayong mahakot ang mga nagliundok nga basura.
Sa milabay’ng mga buwan, gipasigarbo pa sa Cebu City Anti-Mendicancy Task Force nga gipasakaan nila og kaso ang usa ka ginikanan kay mitugot lang sa iyang gamay’ng anak nga magpakilimos. Ang ilang gihimo nakaani og pagdayeg gikan sa publiko.
Apan subo palandungon kay didto ra usab kutob, wala na gayud mausbi pa. Kun kanunayon sa paghimo sa kagamhanan nga ikiha ang mga ginikanan nga nagpasagad sa ilang mga anak, tingali, mapugos ang mga ginikanan sa pag-atiman sa ilang mga anak.
Apan ang sagad himoon sa mga tinugyanan sa kagamhanan mao ra ang pag-rescue sa mga pinasagdan nga anak, pakuhaan og hulagway sa media, ug dayon buhian ra usab ug mobalik ra ang mga bata sa naandan nila nga kalihukan paglakwatsa diha sa kadalanan.