Adunay pipila ka tawo nga nagduda karon nga may kalambigitan si Mayor Tomas Osmeña niining gisugdan paghimo nga sanitary landfill diha sa Barangay Binaliw, Dakbayan sa Sugbo.
Ang mga gipaukyab nga report mao nga posible diay kuno nga gisupak ni Osmeña nga ang dakbayan sa Sugbo adto molabay og basura sa pribadong landfill sa Consolacion kay naghimo man diay og bag-ong landfill diha sa Barangay Binaliw.
Buyno, dili gyud nimo kapugngan nga adunay magduda. Kun ako maoy Osmeña, pahingusgan nako ang pagpahunong sa katukoran nianang maong landfill mentras wala pa makakuha og kompleto nga papeles ang tag-iya niini.
Maayo man nga adunay magtukod og landfill, apan kinahanglan nga dili kay mag-una ang construction nga wala pa gani makakuha’g permiso gikan sa Department of Environment and Natural Resources (DENR), ingon man sa Cebu City Hall.
Nindot kaayo nga negosyo kining pagdumala og landfill kay ang mga lungsod ug siyudad nga walay kaugalingong landfill, adto man gyud molabay’g basura didto, unya sigurado man gyud nga mobayad.
Ang kagamhanan sa dakbayan sa Sugbo lang daan, mogasto og subra sa P200 milyones sa tipping fee kada tuig. Bisan wala ko pangayoi og tambag, apan mas maayo gyud nga mandoan ni Osmeña si Konsehal Alvin Arcilla nga estriktuhon ang pagpatuman sa balaod kabahin sa environment.
Gitug-an ni Arcilla nga gitudlo siya sa mayor nga maoy chairman sa Cebu City Mining and Regulatory Board (CCMRB) ug apil sa katungdanan ni Arcilla ang pagtan-aw sa kalihukan niining maong landfill.
Wala hinoon ko magtuo nga apil si Osmeña sa mga tag-iya niining maong landfill, apan usbon ko, dili makabasol ang mayor nga adunay magduda.
* * *
Tan-awa, patay na usab ang duha ka babaye nga gipangdunggab sa tawo nga naulipon sa ilegal nga drugas didto sa lalawigan sa Siquijor. Unya, malooy gihapon mo kun kining mga adik mapatay sa kapolisan? Unsa may inyong gusto nga unya na kamo moreklamo kun ang mga sakop sa inyong pamilya maoy biktimahon sa mga adik?
Para nako, tinuyoan ang gihimo niining mga tawhana nga nagpagumon sa gidiling drugas mao nga sila nahimong adik. Mosulti ko niana kay panahon sa akong kabatan-on, wala gyud ko magpadala sa akong mga amigo nga misulod sa maong bisyo. Gibalibaran nako sila mao nga wala ko mahisama kanila.
Kuyaw kaayo kining mga tawhana kay panahon nga maulipon sila sa drugas, dili sila masayod kun unsay ilang gihimo. Kining mga tawhana mosukol gyud sa mga polis ug mao nga sila mapatay. Unya molaban mo?