Klaro nga nahasol ang pamunoan ni Presidente Rodrigo Duterte sa nag-ung-ong nga testimoniya ni SPO3 Arturo Lascañas nga nangangkong usa sa mga pangulo sa Davao Death Squad (DDS) ug nilambigit ni Presidente Duterte sa pagpamatay, dili lang sa suspetsadong mga kriminal, kun dili, hasta na sa iyang politikanhon ug personal nga mga atraso.
Ang kalit nga lahugay sa Senado mao lang ang labing uwahi nila nga panagang. Nag-una na ang pasidaan ni Solicitor General Jose Calida pagkiha ni Senador Antonio Trillanes IV tungod sa paghatag og seguridad nila ni Edgar Matobato ug Lascañas.
* * *
Mas nag-una ang pagkisikisi ni Senador Alan Peter Cayetano kinsa nisalikway sa iyang mga kawsa sa pagtunglo sa kabangis sa diktadura ni anhing Presidente Ferdinand Marcos ug pagpasangil og lapad nga kahiwian sa pamunoan ni kanhi Presidente Gloria Macapagal-Arroyo ug nitingob na sa iyang atensiyon pagdupa ni Duterte.
Sa iyang wa’y kinutoban nga suplay sa bisan unsang mga argumento nga makapalambo sa iyang baruganan, sama sa iyang pagluba sa diwa sa EDSA People Power Revolution ug pagpahumot sa laktod nga mga pagpamatay sa gubat batok sa ilegal nga drugas, nidangop si Cayetano sa teknikalidad.
* * *
Matud niya nga dili mahimong paminawon ang inusab nga testimoniya ni Lascañas kay dili kaablihan pagbalik ang imbestigasyon sa DDS nga gitak-opan na sa Senate Justice Committee ni Senador Dick Gordon pinaagi sa Senate Public Order Committee ni Senador Ping Lacson;
Mauwawan ang Senado kun ipadayon ang imbestigasyon bisan nahukman na nga wa’y DDS ug nga wa’y labot si Duterte sa extrajudidicial killings (EJKs); ug
Dili tradisyon sa Senado ang paghimo og botasyon sa dili pa himuon ang imbestigasyon.
* * *
Gitakda na ni Lacson nga usa sa arkitekto pagpalagpot sa mga senador sa Liberal Party sa majority bloc, ang subling pag-atubang ni Lascañas sa Senado karong Lunes. Gawasnon ba ang pakisusi o gamiton lang pagpakauwaw ni Lascañas ug pagkuwestiyon sa tanan niyang pangangkon?
Dili mapalagpot si Duterte, ni motibugsok ang popularidad sa gubat sa drugas human sa testimoniya ni Lascañas, apan ang pagsubli ni Lascañas sa iyang mga pasangil atubangan sa kalibutanong media igo na nga makatay-og sa mga nagtungkawo sa gahum nga kumbinsidong wa’y makabaraw sa ilang kahawod.
(leo_lastimosa@abs-cbn.com)