Niabot gyud og 21 ka tawo ang napaakan sa usa ka irong buang nga naglatagaw na lang didto sa Barangay Casuntingan, dakbayan sa Mandaue kaniadtong Sabado.
Mura’g naghuramentado ang maong iro nga bisan kinsang tawo nga iyang masugatan, iyang paakon. Tungod niini, nameligro ang mga napaakan nga matakboyan og rabies. Wala malilong nga ang rabies mahimong makapatay, ilabi na kun dili madali ang pag-injection og anti-rabies vaccine ngadto sa mga napaakan og iro. Nahimong sumsoman sa katawhan ang pangutana kun kinsa ang angay’ng manubag niini.
Ang Republic Act 8485, kon Animal Welfare Act, naglatid gyud nga ang mga tag-iya sa mga mananap, sama sa mga iro, kinahanglang moalima gayud sa ilang mga binuhi pinaagi sa paghatag kanila og tukma nga pagkaon.
Gawas niini, ang mga magbabalaod naghimo pa gyud og balaod nga mao ang Republic Act 9482 nga nagmando sa mga tag-iya og iro nga kinahanglang kada tuig ang ilang mga binuhi mahatagan og anti-rabies vaccine.
Daghang mga tawo nga gusto kaayong mobuhi og iro, apan dili moatiman kanila sa pagpakaon. Kun may mga momho nga salin sa ilang pagkaon, mao ra ang ihatag ngadto sa ilang mga iro ug pakapinan og mga bukog sa isda nga makatunok pa sa baba sa iro.
Sayon ra nga mailhan ang mga iro nga wala mamaayo sa pag-atiman sa ilang mga tag-iya kay mao kini ang sagad nato nga makit-an nga mangukay sa mga basura. Sama sa tawo, ang usa ka iro nga mapasahan sa ilang pagkaon, moresulta sa pagkabuang. Ang tag-iya sa mga iro wala gayud tugoti sa balaod nga buhian ang ilang mga binuhi nga makahatag og risgo ngadto sa publiko. Nagpasabot nga kinahanglan nga ang kagamhanan, mangita’g paagi nga mailhan kinsa ang tag-iya sa maong iro nga nabuang aron siya tudloan og leksyon.