Nikumpisal si Bise Gobernador Agnes Magpale nga sa ilang mga tigum uban ni Mayor Tommy Osmeña mahitungod sa binayloay og mga luna sa Provincial Ordinance 93-1, wa’y bisan usa ka opisyal sa Kapitolyo nga nakapangahas paghisgot sa elepante, ang labing dakong babag, sa kontrobersiya: Ang kahigayonan nga isalikway sa mayoriya sa mga sakop sa Cebu City Council ang kauyonan nga nakab-ot nilang Osmeña ug Gobernador Junjun Davide.
Symbolic ang pinirmahay nilang Osmeña ug Davide sa kauyonan sa 93-1 sa Plaza Sugbo kay pulos sila wa’y pagtugot sa ilang mga balay balaoranan: Gitun-an na sa Provincial Board ang kauyonan apan si Bise Mayor Edgar Labella nangangkon nga wa pa’y kopya sa kauyonan ang City Council.
* * *
Nipasabot si Magpale nga nagkinahanglan og dugang panahon ang board members kay nausab ang orihinal nga sugyot sa binayloay og mga luna--nadugangan ang mga luna nga gipangayo ug nadugangan sab ang mga luna nga gitanyag sa mga representante ni Osmeña.
Apan nipasalig siya nga dasonan sa mayoriya sa board members ang kauyonan bisan sa pasidaan sa pipila ka department heads nga mas mahal ang mga luna sa Kapitolyo kay sa ibugti sa City Hall. Matud ni Magpale napuno na sa mga molupyo ang mga luna sa Kapitolyo samtang hawan ug mapaubos na dayon og mga transaksiyon ang mga luna sa City Hall.
* * *
Gipahinumdoman ni Magpale ang City Hall nga ang orihinal nga tuyo sa 93-1 mao ang paghatag og luna sa kabus nga mga molupyo. Nisalig hinuon siya sa saad ni Osmeña nga dili papahawaon ang mga nagpuyo ug labaw na nga dili ibaligya ang mga luna ngadto sa dagkong negosyante.
Nipasalig sab si Magpale nga dili dayon ibaligya sa Kapitolyo ang mga luna sa dakbayan nga ilang makuha sa land swap. Palabihon nilang Davide ang pagsulod og joint venture uban sa higanteng developers. Aron nga sukwahi sa nahitabo karon nga kutob ra sa kaibog sa pagkapilu-pilo sa prisyo sa Cebu Business Park, makabahin pa ang mga Sugbuanon kun makabuylo na ang paglambo.
* * *
Balik sa elepante sa 93-1, si Osmeña wa mopakita og bisan gamay nga kabalaka nga dili siya dasonan sa mga konsehal atol sa iyang diskurso sa pinirmahay kagahapon. Inay mangiliyupo nilang Labella ug kaubanan, nihulga na hinuon pagpetisyon og special election aron kahatagan og kahigayonan ang mga Sugbuanon pagpalagpot sa mga konsehal nga mosupak sa kauyonan.
Tingali tungod ni sa pasalig nga dugang mga sakop sa Team Rama ang hagbay ra nga andam na nga mobalitok. Usa o duha nila naghuwat na lang nga ipatawag ni Osmeña, kinsa gikataho nga nanagana sab sa pagpangimbitar. Kay human sa kutas nga sabutsabot sa land swap, dili na ganahan nga maminaw sa bisan unsang pangayuon nga bugti. (leo_lastimosa@abs-cbn.com)