Hilanat, mao ni ang akong nasinati sa dihang nagklase ko sa mga bata. Ako ra ang niinom sa akong tambal ug labaw na nga ako ra pud ang nihatag og comfort sa akong kaugalingon. Akong gikatulog ug sa dihang nahigmata ako akong nasinati ang kapuypoy sa tibuok kong lawas. Butang nga naghatag og dugang kaluya. Apan dunay nindot nga epekto ang pag-inusara ug dunay nindot nga resulta ang kasinatian sa abandonment. Kay diha sa imong pag-inusara ikaw makahinuklog sa imong padulngan ug sa imong tumong sa kinabuhi. Diha sa pag-inusara makita mo ang tinuod nga bili sa imong gimithi taliwala sa mga kagahob ning kalibutana. Ug labaw sa tanan nga diha sa pag-inusara makita mo ang imong dakong panginahanglan nga moangkla sa bisan unsang espirituhanon sa pamasin nga masinati mo ang kalig-on taliwala sa bukbok sa frustrations ug desperations. Pag-ampo nga tingali to tungod kay nakita mo man nga diha sa imong kaluya nanginahanglan ka diay og Ginoo.