Angay na kitang mangandam niining pag-abot sa Zika virus dinhi sa Pilipinas. Basin unya kun kumpiyansa lamang kita ug nga mahisama kita sa mga nasud didto sa South America diin adunay outbreak sa maong sakit nga dala sa lamok.
Dinhi sa Sugbo, aduna nay usa ka kaso sa sakit nga Zika ang narekord sa Departement of Health. Ug makaluluoy ang 22 anyos nga biktima tungod kay nahibaw-an nga usa diay kini ka buntis. Matud pa sa taho nga lima na ka bulan ang iyang gisabak.
Matud sa DOH normal hinuon ang iyang pagburos. Apan bisan pa man kun layo na ang hulga sa maong sakit kaniya, kamulo kini nga gimonitor sa otoridad basin unya kun makaapekto ang Zika virus sa iyang bata nga iyang gimabdos.
Ang maong babaye dinhi sa Sugbo usa lamang sa pipila ka biktima sa Zika dinhi sa Pilipinas. Daghan sa mga kaso ang tua narekord sa Iloilo ug uban pang lugar didto sa Luzon. Hinuon gamay pa lamang ang mga kaso sa Pilipinas kun itandi sa silingan natong mga nasud.
Apan sa ako nang gikaingon, dili gayud kita angay nga mokumpiyansa. Nahibalo na kita sa ka seryoso sa Zika. Gani daghan na ang nangamatay sa maong sakit didto sa ubang lugar sa kalibotan, ilabina sa kanasuran sa South America.
Hinuon dili susama sa dengue ang Zika. Mas seryoso ang dengue gumikan lagi kay dako ang tsansa nga dali rang mamatay ang mataptan niini. Gani liboan na ang namatay sa dengue sa nasud sukad niadtong dekada otsiyenta.
Apan dili sama sa dengue virus, motakod ang Zika virus gikan sa inahan ngadto sa bata nga iyang gimabdos. Makaluluoy gayud ang mga puya nga maigo niini tungod kay ma-deform gayud ang ilang hitsura inig ka tawo nila.
Ang usa usab sa nakaseryoso sa Zika virus mao nga usa kini ka sexually-transmitted disease. Basi sa mga pagtuon sa mga eksperto didto sa Estados Unidos, motakod kining maong sakit pinaagi sa pagpakighilawas. Ug daghan nang kaso niini sa ubang kanasuran.
Mao nang angay gayud nga pangandaman ang Zika karon nga ania na kini sa Sugbo. Kun unsa ka dako sa atong kampanya batok sa dengue, mas ato pa unya kini nga doblehon niining pagtumaw na sa Zika sa atong lugar.