Samtang gitinuod pag-ayo sa kapolisan ang paghimo og kampanya batok sa mga tawo nga tigbaligya og gidiling drugas, apan gipasagdan ra nila ang ilegal nga sugal.
Tungod niini, mikuyanap na pag-ayo ang mga sugal, ilabi na dinhi sa dakbayan sa Sugbo ug kanait nga mga dakbayan. Ang media kanunay nga makadawat og reklamo gikan sa publiko bahin sa ilegal nga sugal, apan nagpakabuta-bungol lang ang kapolisan.
Abi kay ilegal nga drugas ra man ang gianunsyo ni Presidente Duterte nga pahimoan og paspas nga kampanya, wala lang usab himoi og kampanya sa mga polis ang ilegal nga sugal.
Gikataho pa gani nga ang usa sa nagpasiugda sa ilegal nga swertres nga mikatap na pag-ayo dinhi sa Sugbo usa ka tawo nga taga Davao.
Masabot usab kaayo kun ngano nga ang kapolisan wala mohimo’g kampanya batok sa ilegal nga mga sugal, sama sa video karera, moli-moli, ilegal nga swertres, ingon man tigbakay.
Tungod sa pagkuyanap na usab sa mga ilegal nga sugal, mihasi na usab ang pagpangawat apan wala lang kaayo matagad kay ang nagpasuwabi mao man ang report kabahin sa mga pagpamatay sa mga tawo nga nagpadayon sa pagpamaligya’g drugas.
Ang Republic Act 8551 naglatid gyud nga ang mga mayor maoy gitahasan sa paghimo og mga programa batok sa ilegal nga sugal diha sa tagsa-tagsa nila ka dapit.
Apan dinhi sa dakbayan sa Sugbo makuli na kini nga mahitabo sanglit gianunsyo na ni Mayor Tomas Osmeña nga dili siya moabag sa kapolisan sa mga butang nga maglambigit og peace and order.
Dakong hagit kang Police Regional Director Noli Taliño nga samtang aktibo ang kapolisan sa kampanya sa ilegal nga drugas, mohimo usab sila og paspas nga kampanya batok sa ilegal nga mga sugal.