Natambalan na gyud ang kauhaw nga resulta sa hataas nga huwaw nunot sa pag-abot na sa ting-ulan. Ang mga yuta nga nangliki maulian na sama sa naandan, ang mga tanom nga nangalaya ug kamatyonon na, hinay-hinay na usab nga motuyhakaw ang mga udlot nga mahimong lunhaw nga mga dahon ug ang mga sapa nga naughan mapuno na sa tubig nga kalangoylangoyan sa mga isda. Apan luyo niining tanan, adunay peligro nga nagpaabot sa unahan gumikan sa La Niña nga seguro gyud nga magdala og naghinubra nga tubig nga makapusnga natong tanan.
Andam na ba kitang tanan sa pagsungasong sa mga baha ug sa pagsagang sa pagdahili sa yuta? Sa pulong siguro, andam na, apan sa buhat mura’g kaduha-duhaan pa. Sa unang pagbundak sa ulan niadtong nakalabay nga adlaw nakugang man gani ang mga tawo tungod sa pagbaha sa pipila ka mga dapit sa Sugbo.
Nganong ingon na man niadto kadali ang pagsaka sa tubig ilabi na sa mga karsada? Kini tungod kay wala atimana ang mga drainage system nga napuno sa mga sagbot nga unta taas man kaayo nga panahon nga mahimo kining trabahuon.
Daghan pa nga mga sapa ang wala pa usab makabkabi sa mga lapok ug sagbot nga pabor na man unta kaayo niadtong panahon sa ting-init. Kun ang mga local disaster risk-reduction and management office pa ang pasultihon andam na sila sa pagresponde sa mga posible nga mahitabo sa pag-abot sa ting-ulan.
Masukod ra bitaw unya kun unsa sila kaandam simbako lang adunay dako nga katalagman nga moabot. Sigun sa PAGASA nga gawas sa baha ug landslide, posible usab kita nga makasinati og mga gamhanang bagyo sama sa Yolanda. Aduna na bay mga evacuation center nga makasugakod sa paghapak sa super typhoon? Worst case scenario man kaha pirme ang gitan-aw sa mga motumaw nga kalamidad.
Apan subo palandungon nga wala mo-level up ang mga lakang pagseguro sa kaluwas sa katawhan kun ang sistema gipasubay gihapon sa naandan ug wala pa ipahaom sa dako nga kausaban sa panahon, aw segurado gyud nga mapusnga kitang tanan sa katalagman.