Alang sa mga suod o nasuheto sa kinabuhi ni Isyot, ilabi na kadtong mga tawo nga nakapahimulos sa katalagsaon sa iyang pagkatawo, maisip siya nga nakatagong bayani sa ilang mga kasingkasing. Tingali, hapit na 1ka dekada ang nilabay, sukad siya gipapahulay sa kahitas-an.
Layas o bugoy nga pagkabata si Isyot, nga nagdako nga manilhigay sa mga usik o dagami nga nagpasad lang sa sementado nga pantalan sa Pier-1. Malipay sab ang mga trabahante sa arastre, nga nagpahimutang sa mga kargamento. Malimpyo ang palibot sa kakugi sa grupo ni Isyot. Di sab sila alkanse, kay ihatag man tanang natigum nga dagami, sama sa tipasi, bugas, mongos, soya ubanpa.
Mao kini ang pangwarta nga gitud-an nila'g singot, aron sila mabuhi. Gisagup si Isyot, nga igo lang nakatungtong sa hasykol niundang kay gustong siya na la'y modumala sa patigayon sa iyang agalon. Nga dali rang niasenso, kay kuno, pilit og kamot si Isyot kun mao na'y makakupot sa kuwarta.
Dihang nagkahamtong na, inilog kaayo si Isyot sa mga negosyante, nga nanginahanglan sa iya'ng serbisyo nga maghatag proteksyon ug seguridad sa ilang pamatigayon. Strikto nga tigas ang kinaiya niini, nga managana ka sa pagbinuang. Maisog nga pagkatawo, di gusto maagrabyado nga dunay tawong daugdaugon. Mopalit kini og katungod kun may nakita nga dili makiangayon.
Di mahilig sa daghang storya apan mobilib ka sa kaabtik ug kamatinud-anon sa iyang mga maayong binuhatan. Di sab siya mahilig sa politika, apan ang mga tawo maoy naghimo kaniya og kapitan sa barangay. Matud pa niya, bisan sensilyo isipon kining bulawan, nga kuptan pag-ayo nga dili mabuhian, hangtud moabot ang hustong higayon, nga makatubag kini sa dakong panginahanglan.