Panaghimamat sa senior citizens

Sa unang higayon sa kasaysayan sa kalihokan sa mga senior citizen, dul-an sa 4,000 ka senior citizens ning dakbayan sa Sugbo, nagtagbo ug naghimamat didto sa Waterfront Hotel kaniadtong Mayo 4.

“Karon pa gyud ko makatunob niining hotela,” matud sa pipila ka senior citizen. Ug mao kini ang akong namatngonan sa dagway sa mga senior citizen nga maikagong mitambong sa general assembly.

Bisan ako, ikatulo pa kadto nako nga pagtaak sa Waterfront Hotel. Nabawo ko’g pangutana asa mo-park, ug asa moagi padulong sa venue sa assembly. Pastilan!

Basta kay sa akong tan-aw sa mga senior citizens, lipay kaayo sila nga mitambong sa tigum ug lagmit mahimo na kini nga regular nga tigumanan unya sa mga senior citizens sa dakbayan. Pasalamat ngadto ni Win Gatchalian.

Gidapit sa kadagkoan sa senior citizens si Mayor Michael Rama isip keynote speaker ug gihikyad sa mayor ang mga plano niya pagdugang sa mga benepisyo sa mga senior citizens.

Among others, gihisgutan sa mayor ang paghatag og employment sa mga senior citizens nga aduna pay katakus pagtrabaho, kay dili siya buot nga ipadaplin na lang ang mga senior citizens.

Ang pagdugang sa mga benepisyo, pinaagi sa pagpahiluna sa dugang serbisyo aron kapahimuslan sa mas nagkinahanglan og mga pagtagad nga senior citizens.

Kini sama sa pagbutang kanila sa geriatric ward sa CCMC; pagtukod og botika sa senior citizens ug pagpalig-on sa cooperative sa senior citizens.

Gipasalig sa mayor nga mapadayon na gayud ang pagpabarug sa Senior Citizens Center, dugtong sa Gotiaoco Bldg. ug tapad sa Senior Citizens’ Park. Nakighinabi na kuno siya sa kadagkoan sa Chinese Community, bahin ning maong mga laraw.

Nalakip sa agenda sa mayor ang pagtukod og Home for the abandoned senior citizens, ug ang pagbutang og mga senior citizens desks sa matag barangay, aron dunay muatiman sa mga panginahanglan sa senior citizens sa barangay. Sa ato pa, ipaduol ang serbisyo alang sa mga senior citizens ngadto sa barangay mismo.

Mitambong sa tigum sila si OSCA head Domingo Chaves, OSCA Executive Director Pete Cuizon ug ang ubang kadagkoan sa Cebu City Senior Citizens Council (CCSCC).

Ang CCSCC gilangkoban ni Mayor Rama isip chairman, Konsehal Lea Ouano-Japson, vice chair; Belinda K. Navascues, mayor’s authorized representative; OSCA head Domingo Chavez, ug mga miyembro: Felix D. Abella, Atty. Felixberto F. Aliño, Rodulfo N. Antig, Dr. Ester G. Concha, Marven M. Ecarma ug Martiniana D. Mercado.