Ingon niini ang antoson sa mga tawo nga moagi sa dakbayan sa Mandaue paingon sa dakbayan sa Lapu-Lapu gumikan sa pagpatuman na sa Department of Public Works and Highways (DPWH) sa duha nila ka major projects.
Kaniadto pa untang 2015 ipatuman kining mao nga mga proyekto apan wala kini himoa gumikan sa sunod-sunod nga dagkong kalihokan, sama sa APEC meeting, Sinulog ug International Eucharistic Congress.
Niadtong Pebrero 4, gisugdan dayon ang pagpahigayon sa road concreting project sa Ouano Avenue paingon sa dalan Plaridel, Mandaue diin sugdan unyang tungang gabii ang pagkalot sa karsada nga segurado gyud nga makamugna og grabe nga problema sa kahuot sa trapiko.
Apan ang mas makapasakit sa ulo sa mga tawo mao ang mahitabo sugod sa Pebrero 8, diin sugdan na ang pag-repair sa 1st Mactan-Mandaue Bridge.
Sirad-an ang usa ka lane sa tulay nga maoy unahon sa pag ayum-ayom. Ang pikas lane mao ra ang gamiton alang sa mga sakyanan nga mopaingon sa siyudad sa Lapu-Lapu.
Kadtong mga sakyanan nga maggikan sa Lapu-Lapu adto paagion sa Marcelo Fernan Bridge. Ang proyekto molungtad sulod sa 320 ka adlaw, kon napulo ka buwan kapin.
Gipasabot ni DPWH-7 Director Ador Canlas nga gikinahanglan na nga ayuhon ang una nga taytayan tungod sa ka delikado na sa sitwasyon.
Kalbaryo man sa mga tawo ang grabeng traffic sa pagpatuman sa proyekto apan wala nay mahimo tungod kay alang ra man usab kini sa kaluwasan sa tanan nga moagi sa taytayan.
Ang mas maayo nga momata og sayo aron dili mababoy sa trapiko ug dili madelatar sa trabaho.