Sulbad sa trapiko
- Leo Lastimosa (Banat) - February 2, 2016 - 9:00am

Magsugod na karong tuiga ang pagtuon sa kahaom sa gisugyot nga coastal highway nga molatas sa mga dakbayan sa Sugbo ug Mandaue ug mga lungsod sa Consolacion ug Liloan. Gimando ni Kalihim Rogelio Singson sa Department of Public Works and Highways (DPWH) ang feasibility study human nadawat ang pormal nga sugyot ni Kongresista Luigi Quisumbing sa ikaunom nga distrito sa Sugbo.

Matud ni Quisumbing ilang gisugyot sa DPWH nga ang coastal highway magsugod sa South Road Properties (SRP), molatas sa kabaybayonan sa Sugbo ug Mandaue, mosuong sa duha ka taytayan sa Mandaue ug Lapu-Lapu ug molahos sa kabaybayonan sa Consolacion ug Liloan sa amihanang Sugbo.

* * *

Si Quisumbing nga niduaw sa Arangkada sa DYAB Abante Pa, Bisaya! niingon nga mahibaw-an human sa pagtuon kun mapatuman bang proyekto. Ug kun mapatuman man, pila ang gasto ug kanus-a kasugdan ug mahuman. Masaligon si Quisumbing nga ang coastal highway makatabang pagsulbad sa kahuot sa trapiko sa Mandaue ug Metro Cebu.

Nipasabot si Quisumbing nga sama sa ikatulong taytayan, nga gitakdang mosumpay sa SRP ug Cordova, ang coastal highway moiban sa mga sakyanan nga moagi sa Mandaue bisan kun kasilinganang mga dakbayan ug kalungsoran ang destinasyon. Nipuno siya nga ang proyekto haom sa gitakdang pagbalhin sa Cebu International Port (CIP) gikan sa Cebu City ngadto sa Consolacion o Liloan.

* * *

May laing sugyot si Quisumbing pagsulbad sa trapiko sa Mandaue ug kasilinganang mga dapit: Pagtukod og di lang usa kun dili duha gyud ka interchange sa eskina sa Plaridel ug UN Avenue, duol sa baba sa Marcelo Fernan bridge, ug sa eskina duol sa Butuanon bridge.

Kun aprobahan sa DPWH, nangagpas si Quisumbing nga maggamit na gyung North Coastal Road nga alternatibong agianan gikan ug padung sa Mandaue ug amihanang Sugbo. Napanid-ang gilikayan sa mga sakyanan ang coastal road kay kinahanglan pang molibot ilawom sa Marcelo Fernan bridge ug busa naimbudo lang gihapon ang mas daghang sakyanan sa nasudnong highway sa Mandaue.

* * *

Matud ni Quisumbing ang interchange, nga maglakip sa nagkalainlain nga ramps, o mga ang-ang sa mga agianan, aron nga maglahus-lahos ang magsugat nga mga sakyanan, mas barato ug mas epektibo kay sa gisugyot nga pagpalapad sa taytayan sa Butuanon. Kansang kahagip-ot maoy gibasol nga nakatanggong sa mga sakyanan gikan sa amihanan paingon sa Mandaue ug Cebu City.

Dako ang gasto sa mga proyekto nga gisugyot ni Quisumbing apan masaligon siyang uyonan sa Malakanyang ug sa sunod nga administrasyon. Kay di na lang ni pangandoy, nahimo na gyud nga dinaliang panginahanglan tungod sa paspas nga paglambo sa lokal nga ekonomiya sa Sugbo. Nga nakadani sa mas daghang molupyo ug mas daghan ug mas dagkong sakyanan.  

* * *

leo_lastimosa@abs-cbn.com.

ANG CEBU CITY CONSOLACION LILOAN MANDAUE MARCELO FERNAN MGA NGA QUISUMBING QUOT SUGBO
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with