Bugkos nilang Grace ug Chiz
- Leo Lastimosa (Banat) - January 24, 2016 - 9:00am

Nausab si Senador Grace Poe sa ikatulo niyang pagduaw sa Arangkada sa DYAB Abante Pa, Bisaya! Una siyang niduaw sa tungatunga sa niaging tuig dihang nagtimbang-timbang pa unsay himuon sa 2016: Modagan ba pagka presidente, o pagka bise presidente, o tiwason ang nahibiling tulo ka tuig sa iyang unang termino sa Senado?

Ikaduha niyang duaw niadtong Septiyembre dihang nakahukom na sa pagdagan sa labing taas nga katungdanan sa nasud human tun-i ang tanyag sa administrasyon pagpares ni kanhi Interior Secretary Mar Roxas ug nidako nang iyang labaw batok sa ubang presidentiables. Sa ikatulo niyang balik niadtong Biyernes, nius-os nang iyang ratings ug nasugdan nang husay sa Korte Suprema sa disqualification cases batok niya.

* * *

Sa unang duha ka duaw ni Poe, nabantang ang iyang kalapyo--di lang sa iyang panagway kon dili sa kalab-as sa iyang panglantaw unsaon pagsulbad ang nag-una ug dinaliang mga suliran ug panginahanglan sa nasud ug sa katawhan.

Sa unang duaw, nipahibawo si Poe nga nagpatudlo siya sa nag-unang mga eksperto, apil na sa Sugbuanong Senador Serge Osmeña, unsay labing maayong mga programa nga malusad sa sunod nga administrasyon. Sa ikaduhang duaw, niaslom nang ilang relasyon ni Osmeña, kuyog na silang Senador Chiz Escudero ug puno na siya sa mga pasalig unsaon pagpalambo ang Sugbo, Metro Manila ug ubang bahin sa nasud.

* * *

Sa ikatulo niyang balik, nalawos na og diyutay. Pabiling pintok ug masaligon ang sinultihan apan nabantang nang kakapoy. Di lang tingali sa adlaw ug gabii nga pangampanya sa nagkalainlaing bahin sa nasud. Kon dili, ug labi na, sa seryusong mga pasangil nga di siya angay’ng padaganon pagka presidente kay di natural-born Filipino citizen ug wa kahingpit sa 10 ka tuig nga residency requirement.

Nakugang ko nga pagkahuman sa among panagsulti sa radyo, kanus-a gitagsa-tagsa niya pagtubag ang mga punto sa pipila ka mahistrado nga nagduda sa iyang pagka natural-born Filipino citizen, nisulti si Poe nako nga, “Kahit ma-DQ ako, babalik ako dito.” Kabug-at diay sa kabalaka nga iyang gipas-an.

* * *

Nisamot hinuon ang ilang kasuod ni Escudero. Ang relasyon nga naumol dihang nangampanya alang ni anhing Fernando Poe Jr. niadtong 2004 nilambo karon nga nabanhaw ang krisis. Ang bisan unsang intriga sa ilang tandem, apil na nga si Escudero nikabayo lang ni Poe, klarong napakyas sa paglasaw sa ilang panumpa nga mag-inunongay. Sa unang duaw ni Poe, wa siya’y make-up, nananghid pang mamulbos dihang gihangyong interbyuhon sa TV Patrol Central Visayas. Sa ikaduha ug ikatulong balik, andam na pag-atubang sa kamera. May lain hinuon kong nahibaw-an nga laing bugkos nilang Escudero. Sa wa pa manud sa announcer’s booth, nagpabilin sila og pila ka gutlo sa gawas sa building aron, nakatag-an ka, manigarilyo.

* * *

leo_lastimosa@abs-cbn.com

ABANTE PA ANG ATILDE FERNANDO POE JR. INTERIOR SECRETARY MAR ROXAS IYANG KORTE SUPREMA METRO MANILA NGA PATROL CENTRAL VISAYAS QUOT
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with