Kadtong bilas nako nga usa ka inhenyero sa planta sa semento, kugihan nga arang-arang ang pagkabutang ug malipayon uban sa iyang pinanggang asawa. Gumikan sa wa palandunga, nahimong tandogon ang ilang panag-uban. Sukad lang nga gitugotan ang asawa nga moabrod sa 'middle east'.
Sa sinugdanan, permi pa magkontakay sa selpon o sa kompyuter nga masilakon sa ilang mga damgo, alang sa kahamugaway sa kinabuhi. Apan nagkadugay nahanaw ang paglaum, kay napulo na ka tuig, nga wa kabalik sa Filipinas ang asawa niya. Nahibaloan na lang niya'ng may lain nang pamilya.
Mura la'g wa matandog ang bana, nga igo na lang sa panghupaw nga nagpanglingo sa demalas sa iyang kaminyuon. Gitingob na lang ang panahon sa bugtong anak nga wa sab magdugay nabawian sa kinabuhi, kay wa na maatiman pag-ayo sa kabese sa trabaho..nga may mga nagdibal sa iyang panghunahuna.
Wa lang siya makamatikod sa kausaban sa iyang mga gipamati sa lawas, nga maoy mga sintomas sa depresyon, nga kun di matagad mosangpot sa kayabag nga kutluon ang kinabuhi nga inanayon kang paantuson sa kasakit. Busa, angay nato ni maila aron dayon kapanagan-an ang angay buhaton.
* Mura'g linga nga blanko ang panghunahuna, nga dili mahimutang.
* Ang kaugatan sa likod, ingon sa permi magsakit nga gipanuhot.
* Magbutod ang tiyan nga dili kahilisan sa mga pagkaon.
* Wala'y gana nga mokaon, nga permi'ng magluya o gikapoy ang lawas.
* Ang dughan, panuslokon sa kasakit nga maglisud sa pagginhawa.
* Mura'g saputon nga dali masuko, nga mosaka ang presyur sa dugo.
* Maglabad ang ulo nga way ayo ang kinatulgan, nga permi kalipungon.
Apan ang kaguol ug ang kawad-on sa paglaum, mao'y utok sa depresyon.