Selfie dinhi...groupie didto...upload, like, and share plus hashtag#
Nahimo na kini nga kabahin sa inadlaw-adlaw nga kinabuhi ni Juan dela Cruz karon nunot sa easy access sa teknolohiya nga anaa na kanunay sa palad sama sa android or smartphones.
Kalingawan, balita, negosyo mahimo na pinaagi sa cellphone apan dili lang alang sa kaayohan ang mamugna niini, kun dili, gigamit na usab diay kini karon sa kadautan pinaagi sa pagpamiktima sa kababayen-an, ilabi na sa kabataan pinaagi sa cyber pornography.
Niadtong Sabado usa ka 18-anyos nga babaye ang nasakpan sa akto sa pagpangronda sa Inter-Agency Council Against Trafficking (IACAT) nga mihubo sa sapot sa menor de-edad niya nga pag-umangkon aron mohimo og malaw-ay nga pasundayag alang sa pedopilya nga kliyente nga nagbase sa Amerika.
Dili laptop o personal computer ang gamit sa suspek sa iyang modus, kun dili, cellphone. Admitido ang National Bureau of Investigation nga dako nga hagit alang kanila ang pagsumpo niini sanglit halos tanan karon aduna nay mga cellphone nga puwede gamiton bisan asa basta aduna lay signal. Maayo na lang kay nakig-alayon kanila ang US Homeland Security nga maoy nakamatikod sa mga pedopilya didto sa gawas sa nasud nga mitukob sa mga biktima pinaagi sa internet ug mao usab ang nakatumbok sa gipangbuhat sa kakunsabo sa lungsod sa Cordova.
Sama sa katarungan sa mga nahauna nga mga nadakpan sa cyber pornography, ang kalisod ang nagtukmod kanila sa paghimo sa ingon. Kalisod sa ilang mata!
Ang katapolan, walay katagbawan ug dali nga mahaylo sa tinagingting sa salapi maoy hinungdan sa pagkatumpawak nila sa kaalautan.
Ang nakapait kay giamong pa nila pagpahimulos ang mga inosenteng bata. Selfie pa more...Priso lagi!