Pipila ka pangutana ug tubag sa disqualification cases nga giatubang ni Senador Grace Poe sa iyang kandidatura pagka presidente:
Nganong nagsunudsunod man ang disqualification cases nga gipasaka batok ni Poe?
Kay siya ang nag-unang piliunon pagka presidente sukad sa nasudnong surveys sa Hunyo ning tuiga, nitidlom lang og gamay sa iyang pagdupa sa protesta sa Iglesia ni Cristo apan nibalik ra sab dayon pagsaka.
Nganong karon pa man siya husaya sa Senate Electoral Tribunal (SET) ug Commission on Elections (COMELEC) nga niadto ra man untang 2013 siya nidagan ug nakadaog pagka senador?
Kay ang SET ug COMELEC di makalusad og husay batok ni Poe o ni bisan kinsa kun way pormal nga reklamo nga ipasaka ug way bisan usa nga nipasaka og kaso batok ni Poe sa iyang pagpasaka og certificate of candidacy pagka senador niadtong Oktubre 2012 alang sa piniliay sa Mayo 2013.
Ikiha kaha si Poe kon wa pa siya modagan pagka presidente o kun nisugot lang nga mag bise presidente? Labing seguro nga wa gyu’y kaso si Poe kun nihukom pa lang nga magpabilin sa Senado ug tiwason ang iyang termino sa 2019 apan tungod sa iyang pagpangambisyon og mas taas nga katungdanan may mga interes nga nahulga ug busa nanguhong ang mga kaso batok niya.
Kinsa man ang utok sa disqualification cases batok ni Poe?
Lisod tubagon. Way usang matumbok nga utok sa pagpasaka sa mga kaso apan ang tanang karibal ni Poe mahimong kadudahan. Apil na si Davao City Mayor Rodrigo Duterte nga, bisan uwahi nang nideklarar sa iyang kandidatura, maoy labing agresibong nipasangil ni Poe nga di natural-born Filipino citizen. Posible bang si kanhi Interior Secretary Mar Roxas ang nipalihok sa iyang mga abogado pag-apiki ni Poe og daghang kaso?
Posible, apan lisud pamatud-an. Kun mataktak si Poe, maibanan nang mga babag sa iyang ambisyon pagpuli sa Malakanyang. Lisud pamatud-an kay mahimong nigamit og mga tawo nga way labot niya, mahimo sang nidangop sa iyang mga kanhi abogado ang ubang kaatbang ni Poe.
Posible bang si Bise Presidente Jejomar Binay ang nipakiha ni Poe?
Pareha ra og tubag sa pasangil batok ni Roxas. Ang kampo ni Binay ang labing unang nipasangil nga di tinuod nga Filipino si Poe apan gibakwi hinuon dayon human nisamot hinuon pagsulbong ang popularidad ni Poe. Kahukman bang mga kaso ni Poe sa di pang piniliay sa Mayo 9, 2016?
Mag-agad sa Korte Suprema nga maoy sangkoan sa tanang kaso.
Makaayo ba sa nasud o panglawgaw lang ang mga kaso batok ni Poe?
Mahimong panglawgaw lang ang katuyoan sa pipila apan di makadaot sa nasud ang pagtino natural-born Filipino ba ang gituohang sunod nga pangu sa nasud.
* * *