Naalarma na gayud ang kabomberohan sa mga sunog nga ang paggamit sa butane canister maoy hinungdan. Gani gisugdan na sa mga kadagkoan sa Bureau of Fire Protection 7 ang pag-umol og task force diin tutokan ang paggamit sa butane isip hulip sa LPG.
Ang task force langkoban sa Department of Trade and Industry (DTI), Philippine National Police (PNP) ug Business Permit and Licensing Office (BPLO) sa mga local government units.
Wala malakip ang butane sa mga gidili sa Fire Code of the Philippines kay wala kini ma-anticipate nga moabot ang panahon nga gamiton diay kini sa pagluto sa kadaghanan kay barato man kini kun itandi sa LPG.
Apan nakita na karon sa kabomberohan ang kadelikado sa paggamit sa butane gas, ilabi na kay ang canister nga gigamit niini pwerteng nipisa ug ka usa ra gyud unta gamiton. Ang nakalawgaw kay gisigehan man kini og refill ug ang nakakuyaw kay gisudlan na kini og LPG nga kun atong hunahunaon dili gyud angayan gumikan sa kanipis sa canister.
Alang sa padayong nagamit ug nagpa refill og LPG sa maong canister, kun mahimo hunonga na ninyo kay delikado kaayo nga mo- explode ug maoy hinungdan sa sunog. Ayaw ninyo paabota nga mahitabo pa kining maong mga trahedya usa pa kamo mohunong sa pagamit niini.
Ang inyong kabomberohan walay gahum sa pag-confiscate sa maong mga butane gas canisters labi na gyud sa mga tago-tago nga operasyon sa mga refilling station nga klaro kaayong walay business permit.
Mao ni ang rason nga makig-coordinate kami sa DTI ug PNP nga maoy mga ahensiya nga adunay awtoridad nga makadakop ug maka- confiscate niini.
Kun duna'y mga refilling station nga anaa mahimutang duol sa inyong lugar, ayaw kamo pagduhaduha og report sa opisina sa kabomberohan aron masusi dayon namo kini ug mahatagan og tukmang lakang.
Ayaw ninyo paabota ang trahedya nga mahitabo usa pa kamo magpakabana. Tawag kamo sa among rehiyonal nga buhatan sa BFP 7 sa numero 256-0553 ug 254-8386.