Ang COPD (Chronic Obstructive Pulmonary Disease) o sakit sa pulmonya nga kun di maatiman, mosangpot kini sa kanser sa baga. Busa, aron kini dili mograbe , girekomendar sa mga eksperto nga kini mao ang atong buhaton;
* Mohunong sa panabako — Segun sa 2005 ATS, American Lung Association, ang paghunong sa panabako sama sa sigarilyo, maoy labi'ng importante nga makapahingilin sa mga sintomas sa COPD o pulmonya.
* Magpabilin nga aktibo — Ang pisikal nga ehersisyo, makapalig-on ni sa kaugatan sa "respiratory', ug makapaluag sa gininhawa. Sulaye ang paglakaw-lakaw, nga makapalig-on sab sa katibuk-an sa panglawas, matud sa Mayo clinic.
* Mag-'window shopping' — Kana'ng mangompra nga maghinan-aw lang, makatabang ni nga malingaw ka pa ug makapahamugaway sa pagginhawa.
* Husto'ng pagkaon — Nga di magpasubra sa timbang, kay wa mabalanse ang nutrisyon mo. Mosamot nga way ehersisyo nga buhaton. Limitahe ang parat ug tam-is, nga ginagmay la'y kaonon kada tingkaon mo, nga di sab ka modaut.
* Kontrol sa pagginhawa — Segun sa American Association of Respiratory Care, ang pagginhawa nga iabot sa ginhawaan (diaphragmatic), makadugang sa lebel sa oxygen sa dugo aron di maglisud sa pagginhawa. Girekomendar ang pag-inom og dagha'ng 'fluid' sama sa tubig, aron kanunay luag ang mga agianan nga di mabara sa plema (mucos), ug ang paggamit og 'humidifier' o 'enhaler', sa ingon permi hamugaway ang imong pagginhawa, matud sa Mayo clinic.
* Protektahe ang kaugalingon — Ang kabugnaw sa klima, makapasamot ni's sintomas sa pulmonya. Ampingi ang emosyon nga dili ka sab ma-stress.
* Tukma'ng medikasyon — Seguroa nga nakasabot ka's tambal nga gitumar mo gikan sa doktor o sa pang-alibyo nga herbal para sa sakit nga pulmonya.